CCM chali tena Dar

Mhe. Musa Swedi Kafana, Naibu Meya wa Jiji la Dar muda mchache baada ya kuchaguliwa

VYAMA vinavyoundwa na Umoja wa Katiba ya Wananchi (Ukawa) vimezidi kukinyima raha Chama Cha Mapinduzi (CCM) ndani ya Jiji la Dar es Salaam baada ya kukibwaga tena katika kinyang’anyiro cha Naibu Meya wa Jiji.




Katika uchaguzi wa Naibu Meya wa Jiji uliofanyika katika ukumbi wa Karim Jee Dar es Salaam mgombea CCM Mariam Lulida aligaragazwa na mgombea wa Ukawa Mussa Kafana kutoka Chama Cha Wananchi (CUF) kwa kura 16.

Akitangaza matokeo ya wagombea hao baada ya kura kupigwa Sarah Yohana Kaimu Mkurugenzi wa Jiji amesema jumla ya wapiga kura ni 16,zilizoharibika ni sifuri, kura halali ni 16, hivyo Kafana amepata kura 10 huku Lulida akipata kura 6.

Kafana ambaye pia ni diwani wa Kiwalani baada ya kuapishwa na Aziza Kalli Hakimu Mkazi Mkuu Mahakama ya Hakimu Mkazi Sokoine Drive Dar es Salaam amewashukuru wapiga kura wake kwa ujumla huku akikishukuru chama chake na viongozi wa Ukawa kwa kufanya kazi kwa ushirikiano.

Baada ya kiapo Kafana ameahidi kushirikiana na Isaya Mwita Meya wa Jiji katika kuleta maendeleo huku akiahidi kuborsha vitu vyote ambavyo haviko sawa hususani mali za wananchi.

Katika hatua nyingine Kafana ameahidi kufanya kazi kwa umoja bila kujali itikadi za vyama huku akisema atakuwa mstari wa mbele katika kumshauri Mwita katika maamuzi ya kimaendeleo ikiwa ni pamoja na kuboresha mambo yanayominya haki za wananchi.

“Niwatoe hofu wananchi wote waliotupigia kura kuwa, timu walioichagua kukamata Jiji hili ni nzuri, haibabaishwi wala kutishwa kwa kuwa inajiamini na ipo tayari na itaweza kukumbizana na kasi ya Rais John Magufuli” amesema Kafana.

Naye Lulida ambaye pia ni Diwani wa Kata ya Mchafukoge licha ya kushindwa kupata kiti cha unaibu Meya amesema, “Nitashirikiana na mwenzangu aliyepata nafasi hii nitajitaidi kumpa mawazo chanya ili kuboresha kwani lengo letu wote ni kuwahudumia wananchi”.

Naye Abdallah Chaurembo Meya wa Halmashauri ya Manispaa ya Temeke akitoa maoni yake juu ya uchaguzi huo wa Naibu Meya amesema, “Kwakweli uchaguzi ulikuwa wa haki na huru, hakuna aliyeonewa wala kuibiwa na tumeridhika na matokeo kwani lengo ni moja kuwasaidia wananchi.”
CHANZO: MWANAHALISI ONLINE.

Lugumi balaa

Naibu Inspekta Generali wa Polisi (D/IGP), Abdulrahman Kaniki.

WAKATI sakata la ufisadi wa mkataba kati ya Kampuni ya Lugumi Enterprises Ltd na Jeshi la Polisi likiendelea kufukuta, imebainika Sh milioni 500 zilichotwa bila maelezo yoyote.

Habari za uhakika zilizopatikana mjini hapa jana, zinasema upotevu huo umebainika baada ya Mkaguzi na Mdhibiti Mkuu wa Hesabu za Serikali (CGA), kufanya ukaguzi wa taarifa za mapato na matumizi ndani ya Jeshi la Polisi.

Taarifa hizo ziliwasilishwa juzi na Ofisa Masuhuli wa Wizara ya Mambo ya Ndani ya Nchi, Katibu Mkuu wa Wizara ya Mambo ya Ndani ya Nchi, Meja Jenerali Projest Rwegasira na Naibu Inspekta Generali wa Polisi (D/IGP), Abdulrahman Kaniki.

Kwa mujibu wa chanzo cha kuaminika kutoka ndani ya Kamati ya Bunge ya Hesabu za Serikali (PAC), vigogo hao walishindwa kutoa maelezo ya kina kuhusu tofauti hiyo ya fedha, mbele ya wajumbe wa kamati hiyo.

Chanzo hicho kiliiambia MTANZANIA mjini hapa jana, kuwa wajumbe wote walitilia shaka mkataba kati ya polisi na Kampuni ya Lugumi ambao zabuni yake ilitangazwa kwa siku moja na kesho yake ukasainiwa.

YALIYOBAINIKA
Chanzo chetu kinasema katika kikao na vigogo hao, wajumbe wa PAC walihoji taarifa ya utekelezaji wa mkataba huo na kuonyesha hofu ya kuwapo ‘wingu la ufisadi’ ambalo linahitaji majibu.

“Zabuni ilitangazwa Septemba 22, mwaka 2011 na mkataba kusainiwa Septemba 23, mwaka huo huo, ndani ya siku moja mkataba ukasainiwa jambo ambalo ni hatari.

“Jambo jingine linaloshtua, tangu wakati huo mashine zote wanasema zipo, lakini hazifanyi kazi na swali ambalo wajumbe wanahoji, inakuwaje wanatoa zabuni bila kufanya ‘visibility study’ ya kina ili kujua uwezo wa hii Kampuni ya Lugumi kama ilishawahi kufanya kazi ya aina hii ama la.

“Tumejipanga kwa kila hatua, tumemtaka Makamu Mwenyekiti wetu Aeshi Hilaly, awasilishe taarifa nzima kwa Spika wa Bunge, Job Ndugai na mwishowe taarifa hii iwasilishwe mbele ya Bunge ili umma ujue namna watu wanavyotafuta fedha kinyume cha sheria,” kilisema chanzo chetu.

Mbali na hilo, pia kamati imebaini tofauti ya fedha zilizopo katika mkataba huo ambapo taarifa ya Jeshi la Polisi inaonyesha walitoa Sh bilioni 37,163,940,127.7, wakati taarifa ya CAG,  inaonyesha zilizotolewa ni Sh bilioni 37,742,913,007, ikiwa na tofauti ya zaidi ya Sh milioni 500.

“Katibu Mkuu na wenzake, walipotakiwa kutoa maelezo ya kina kuhusu zilipo Sh milioni 500 walishindwa, wajumbe wakageuka mbogo na kutaka suala hilo litolewe maelezo ya kina.

“Licha ya hali hii, PAC tulibaki tukijiuliza, hata kama kulikuwa na ulazima wa kufunga mashine hizi kwa dharura inakuwaje hazifanyi kazi?  Maana kuna kila dalili ya fedha za umma kuliwa mchana kweupe,” kilisema chanzo chetu.

Pia kamati hiyo ilibani mkataba ulitolewa kwa ‘single source’ (yaani kampuni moja bila kuishindanisha na nyingine), badala ya tenda kushindaniwa na kampuni nyingi zaidi.

VIGOGO WAHAHA
Baada ya PAC kuendelea na kazi ya kuchambua taarifa hiyo, kigogo mmoja ambaye anatajwa kuhusika katika mkataba huo, amekuwa akihaha kuomba nguvu ya wabunge wa Kambi ya Upinzani, hasa wale wanaotokana na vyama vinavyounda Umoja wa Katiba ya Wananchi (Ukawa) ili wamnusuru.

“Ninamshangaa huyo waziri (jina linahifadhiwa), anahangaika bure, eti anasema watu hawampendi na wanamchukia, amefikia hatua ya kusema PAC inatumiwa na wauza dawa za kulevya.

“Sisi ni wajumbe ambao kila mmoja anajiweza, hata siku moja hatuwezi kukaa kutegemea fedha za watu, ila tunafanya kazi kwa masilahi ya nchi yetu na si vinginevyo. Tumeridhika na posho tunazolipwa na Bunge, hatuna haja ya kutumika kwa mtu yeyote ila tunasukumwa na uzalendo kwa Taifa letu,” kilisema chanzo chetu.

Katika kile kinachoonekana ni kama maigizo, baada ya PAC kutaka mkataba na taarifa ya utekelezaji wa mradi huo wa ufungaji wa mashine za utambuzi wa alama za vidole katika vituo vya polisi 108 nchini, sakata hilo limekuwa likichukua sura mpya kila kukicha.

Uamuzi huo uliibua hisia miongoni mwa jamii ambapo katika kipindi cha siku mbili baada ya PAC kutaka ripoti hiyo, Kamati ya Bunge ya Mambo ya Nje, Ulinzi na Usalama, iliingilia kati ambapo mwenyekiti wake, Balozi Adadi Rajabu, alikiri kupokea mkataba huo.

UTATA
Kampuni ya Lugumi inadaiwa kupewa tenda na jeshi hilo kwa ajili ya kufunga mashine za kuchukua alama za vidole – ‘Biometric Access’ katika vituo 108 nchi nzima kwa gharama ya Sh bilioni 37.

Hadi sasa mashine hizo zimefungwa katika vituo 14 pekee na tayari kampuni hiyo imelipwa Sh bilioni 34 ambazo ni sawa na asilimia 99 ya fedha zote za mkataba.

Katika sakata hilo, inadaiwa Kampuni ya Lugumi ilipewa zabuni hiyo ikiwa haina uzoefu wa kazi hiyo.
“Wamepewa mkataba sawa, lakini mbona taarifa zinaonyesha kuwa kampuni hii haijasajiliwa kama Biometric Access Company na haijawahi kufanya kazi zozote zinazohusu Biometric Access Control?” alihoji mmoja wa wataalamu.
CHANZO: MTANZANIA.

Makonda: Sijaridhishwa na idadi ya watumishi hewa Dar

Mkuu wa Mkoa wa Dar es salam Paul Makonda.

MKUU wa Mkoa wa Dar es Salaam, Paul Makonda amesema hajaridhishwa na idadi ya watumishi hewa aliyopatiwa na maofisa utumishi.

Mbali na hilo, ameitaka Taasisi ya Kuzuia na Kupambana na Rushwa (TAKUKURU) kuwahoji maofisa utumishi wote wa mkoa huo,  kwani ndiyo wanaotoa taarifa zisizokuwa sahihi.

Akizungumza na waandishi wa habari ofisini wake jana, Makonda alisema haiwezekani Mkoa wa Dar es salaam ulio na wajanja wengi na matapeli kuwa na wafanyakazi hewa 71 tu.

“Baada ya Rais kutoa agizo la kutaka kila mkoa utaje idadi ya watumishi hewa, niliunda tume ya kufanya uchunguzi, lakini kwa uchunguzi wa awali nililetewa idadi ya watu 71 kwa kweli hii idadi sikubaliani nayo.

“Inaonekana kuna watu wanatengeneza habari ili wajiongezee kipato hali ambayo wanatoa takwimu zisizo sahihi, kwa kuligundua hili nimeamua kufanya uchunguzi upya na kila siku idadi inaongezeka,”alisema Makonda.

Alisema kutokana na udanganyifu wa  takwimu zisizo sahihi, amewaagiza wakuu wa wilaya zote  kuacha shughuli zao na badala yake wafuatilie idadi ya watumishi hewa kwa kila wilaya.

Alisema amefanya mazungumzo na ofisi ya utumishi wa umma ili kupata idadi kamili ya watumishi wa serikali  walioko wilaya zote.

“Ofisi ya utumishi ndio ofisi inayojua idadi ya watumishi walioajiriwa, watatusaidia kujua ukweli baada ya hao wakuu wa wilaya kutoa taarifa za watumishi hewa ,”alisema  Makonda.

Alisema katika hatua nyingine za kupambana na watumishi hewa, tumepata mfumo wa malipo unaotambulisha watumishi wote ambao wanapokea mishahara kutoka serikalini.

Alisema Wilaya ya Kinondoni tayari watu 34 wamechukuliwa hatua za kisheria, ikiwa ni pamoja na kufunguliwa jalada tangu Aprili 8 mwaka huu.

Alisema amepata taarifa ya kuwapo watumishi ambao wamejifutia madeni baada ya kusikia uchunguzi unafanyika.
CHANZO: MTANZANIA

Ndugai, Majaliwa matatani

Spika wa Bunge la Jamhuri ya Muungano wa Tanzania Mh. Job Ndugai.

WABUNGE wamepania kuwaweka kikaangoni Spika wa Bunge, Job Ndugai na Waziri Mkuu, Kassim Majaliwa, kwa sababu tofauti katika Mkutano wa Bunge ulioanza Jumanne wiki hii, Raia Mwema limeambiwa.

Wabunge hao wanatarajiwa kumbana Ndugai kutokana na kile kinachodaiwa kuwa “amekuwa upande wa serikali kuliko wabunge” katika kipindi chake kifupi cha kuwa Spika wa Bunge.

Mmoja wa wabunge waandamizi kutoka Chama Cha Mapinduzi (CCM) aliyezungumza na gazeti hili kwa masharti ya kutotajwa jina, alisema ingawa yeye hatashiriki katika mpango wowote wa kutaka kumuondoa Ndugai katika wadhifa wake huo, anafahamu kwamba kuna kitu “kinaendelea”.

“Mimi Ndugai ni rafiki yangu na kusema kweli siwezi kushiriki katika jambo lolote linaloweza kumuweka katika nafasi ngumu. Hata hivyo, ninazungumza na wabunge wengi wa CCM na upinzani lakini picha ninayoipata si nzuri.

“ Hawamzungumzi vizuri kusema kweli na mimi inaniuma kwa kweli. Kuna kina kitu nadhani kinaendelea lakini kwa sababu siko kwenye mipango ya kumshughulikia, siwezi kujua nini kimepangwa,” alisema mbunge huyo ambaye hata hivyo hakutaka kutajwa jina lake gazetini.

Raia Mwema limeambiwa kwamba mpango wa kumshughulikia Ndugai unaandaliwa kwa siri na kikundi cha wabunge wa CCM wakishirikiana na wengine kutoka katika vyama vilivyo katika Umoja wa Katiba ya Wananchi (Ukawa).

Mtoa taarifa wa gazeti hili ambaye ni mmoja wa wabunge wapya katika Bunge la Tanzania, alisema wabunge wameudhiwa na mambo makubwa matatu katika utawala wa Ndugai ambaye amechukua nafasi ya Anne Makinda aliyekuwa Spika katika Bunge lililopita.

Ndugai, kwanza, anadaiwa kuwa amekubali kinachoitwa “mkakati wa serikali kulidhibiti Bunge” kwa kuruhusu Kamati za Uwajibikaji za Bunge kama ile ya Hesabu za Serikali (PAC) kuongozwa na wabunge wa upinzani wanaodaiwa kuwa na uwezo mdogo.

Vyama vilivyo ndani ya Ukawa, vikiongozwa na Kiongozi wa Kambi ya Upinzani Bungeni (PAC), Freeman Mbowe, havijaridhika na ukweli kwamba wabunge ambao wao waliwataka kuwa wenyeviti wa kamati hizo za usimamizi, wamepelekwa katika kamati ambazo hazina ushawishi kwa jamii.

Kwa mujibu wa taratibu za kibunge kwa mabunge ya nchi wanachama wa Jumuiya ya Madola, kamati za usimamizi zinatakiwa kuongozwa na wabunge kutoka katika vyama vya upinzani.

Hata hivyo, Kambi ya Upinzani Bungeni imekataa kushiriki katika uchaguzi wa kuchagua wenyeviti wa kamati hizo safari hii kwa maelezo kuwa ilitakiwa yenyewe ndiyo ipendekeze majina ya wajumbe wa kwenye kamati hizo wanaofaa kuwa wenyeviti.

Katika utetezi wake, Ndugai ameeleza kuwa alichofanya yeye ni kuwaweka wabunge katika kamati walizoomba kupangiwa na hawezi kulaumiwa kwa kufanya hivyo.

Kwa sasa, PAC na ile ya Hesabu za Serikali za Mitaa (LAAC) zinaongozwa na Makamu Wenyeviti ambao ni wabunge kutoka CCM.

Lawama ya pili kwa Ndugai inatokana na wabunge wanne kufikishwa mahakamani kwa tuhuma za rushwa; ambapo wapo wabunge wanaodai kuwa Bunge halikuwalinda dhidi ya tuhuma hizo.

Wabunge ambao tayari wamefikishwa mahakamani kwa tuhuma za rushwa ni Richard Ndassa, Suleiman Sadiki, Kangi Lugola na Victor Mwambalaswa; huku baadhi ya wabunge wakihamishwa kutoka kamati moja kwenda nyingine kwa tuhuma za rushwa.

Mmoja wa wabunge ambao wamefikishwa mahakamani alizungumza na gazeti hili Jumamosi iliyopita na kudai kwamba kwa wao kufikishwa mahakamani, taasisi nzima ya Bunge inaonekana kuwa haifai.

“Spika atasababisha wananchi watuone sisi hatuna maana. Sisi tunadhani kwamba hilo ndilo lengo kuu la serikali kwamba tuache kuisimamia ipasavyo kwa kuonekana ni wala rushwa.

“ Kama wabunge wataonekana ni wala rushwa, watakuwa na nguvu gani ya kuinyooshea kidole serikali kwamba iwajibike? Ndugai anaona hili ni jambo la kisheria lakini natamani angejua zaidi ya kinachoonekana kwa nje,” alisema mbunge huyo mashuhuri.

Sababu nyingine ya tatu inayodaiwa kuwafanya wabunge hao wajipange dhidi ya Ndugai ni kitendo cha Bunge kubana matumizi yake na kupeleka Ikulu shilingi bilioni sita ambazo Magufuli tayari amesema zitatumika kwa ajili ya ununuzi wa madawati.

Kuna kundi la wabunge wanaoamini kwamba fedha hizo bado zingeweza kutumika kwa ajili ya shughuli za Bunge na wabunge; hata kama matumizi ya ununuzi wa madawati yatawanufaisha kwa vile yatapelekwa majimboni kwao.

Majaliwa
Uwezekano wa Majaliwa kuwa na wakati mgumu bungeni unajengwa na hoja zilizoanza kuibuka kwamba Rais Magufuli anafanya kazi za kugawa fedha ambazo kikatiba ni majukumu ya Bunge.

Mifano inayotolewa ni hatua ya Magufuli kuamuru fedha zilizopangwa kwa ajili ya maadhimisho ya Siku ya Uhuru kutumika kwa ajili ya ujenzi wa kipande cha barabara mpya ya Bagamoyo (New Bagamoyo) kati ya Morocco na Mwenge na zile zilizotengwa kwa ajili ya sherehe za Muungano zitumike kwa ajili ya upanuzi wa kipande cha Barabara ya Makongoro ya jijini Mwanza kati Nera na Uwanja wa Ndege.

Mtu wa kwanza kuhoji kuhusu jambo hilo alikuwa ni Waziri Mkuu wa zamani, Edward Lowassa, aliyezungumzia jambo hilo wakati akizungumzia utawala wa Magufuli.

Lowassa alidai kwamba kazi ya kupanga matumizi ya fedha ni ya Bunge na kwamba ni hatari kwa jambo hilo kufanywa na Rais. Raia Mwema limeambiwa kwamba ule ulikuwa ni ujumbe kwa wabunge wa Ukawa.

“ Kwa sababu Magufuli hatakuwa bungeni, mtu ambaye ataulizwa maswali ni Majaliwa. Yeye ndiye atajibu maswali kumhusu Magufuli. Nakuahidi kwamba sasa Majaliwa ndiyo atajua Uwaziri Mkuu si lelemama,” chanzo chetu kilisema.

Akizungumzia hoja hizo za dhidi ya serikali, Waziri wa Nchi Ofisi ya Rais (Tamisemi), George Simbachawene, alisema hoja zote ambazo zitaletwa zitajibiwa ipasavyo.

“ Hakuna ambacho kimefanyika kisicho na maelezo. Walete hoja zao mezani na zitajibiwa kwa maelezo fasaha. Hatuna la kuficha na wananchi ni mashahidi wetu.

“ Ila wafahamu kwamba Rais Magufuli kwa sasa ni kipenzi cha wananchi wanyonge na walio wengi hapa nchini. Kila anachofanya wananchi wanamuona na kumuelewa na ndiyo maana wanamuombea kila siku,” alisema Simbachawene.

 CHANZO: RAIA MWEMA.

Lugumi hali tete

Said Lugumi

SAKATA la mkataba tata wa Kampuni ya Lugumi Enterprises na Jeshi la Polisi, limezidi kuwa tete baada ya vigogo wa Wizara ya Mambo ya Ndani ya Nchi kuhojiwa kwa saa saba na Kamati ya Hesabu za Serikali (PAC) mjini Dodoma jana, huku mmiliki wake, Said Lugumi akiwapiga chenga waandishi wa habari Dar es Salaam.

Akizungumza na MTANZANIA mjini Dodoma jana, Makamu Mwenyekiti wa PAC, Aeishi Hilaly, alisema kamati yake iliwahoji vigogo wawili wa Wizara ya Mambo ya Ndani ya Nchi, kwa sababu wao ndio watendaji wakuu.

Alisema watendaji waliowekwa kitimoto ni Katibu Mkuu wa Wizara hiyo, Meja Jenerali Projest Rwegasira na Naibu Inspekta Jenerali wa Polisi (D/IGP), Abdulrahman Kaniki.

Aeshi alisema licha ya kuwahoji viongozi, suala hilo bado ni zito na kamati yake itatoa maazimio yatakayofikiwa leo saa sita mchana.

“Tumewahoji watendaji hawa wakuu wa wizara, suala hili bado zito tunawaomba muwe na subira kesho (leo), tutawapa taarifa za maazimio yatakayokuwa yamefikiwa na kamati yangu.

“Mpaka sasa kazi ni ngumu mno, tunaendelea kutafuta ukweli wa jambo hili, hawa walikuja na wataalamu wao.

“Kikubwa kila hatua ambayo tunafikia, lazima tumwarifu Spika wa Bunge ambaye ndiye anayetoa uamuzi juu ya jambo lolote linalohusu Bunge. Siwezi kusema lolote leo (jana), naomba mridhike na hili ninalowaambia kwanza,” alisema Aeshi.

Alipoulizwa Aeshi kama Lugumi ameitwa mbele ya kamati yake, hakuweza kuzungumza baada ya ofisa mmoja wa Bunge kumfuata na kuambiwa anaitwa kwa Spika.

KATIBU WA BUNGE
Kutokana na hali hiyo, MTANZANIA ilipomtafuta Katibu wa Bunge, Dk. Thomas Kashilillah ambaye suala la Lugumi bado lipo PAC, alisema kamati hiyo, ikimaliza kazi yake itatoa taarifa za maazimio yaliyofikiwa.

KATIBU MKUU AGOMA
Waandishi walipomfuata Meja Jenerali Rwegasira ili kujua alichoitiwa na kuhojiwa na Kamati ya Bunge, aligoma kwa kusema hayuko tayari kuzungumzia suala hilo.

“Siko tayari kuzungumzia suala hili, kwanza nikiongea mnaninukuu vibaya kwa maneno ambayo sijasema,” alisema Meja Jenerali Rwegasira na kuondoka.

MAIGIZO YA LUGUMI
Jijini Dar es Salaam, mfanyabiashara anayemiliki kampuni hiyo, Said Lugumi, ameitisha mkutano wa waandishi wa habari uliogeuka kama maigizo baada ya ‘kupotea’ ghafla na badala yake wakaibuka waliotajwa kuwa wapambe wake.

Waandishi walijitokeza kwa wingi kwenye chumba cha mkutano kuanzia saa 5:00 asubuhi ambapo walitangaziwa kuwa mzungumzaji mkuu atakuwa Lugumi.

Wakati waandishi wakiandelea kumsubiri, mwandaaji wa mkutano huo, Benny Kisaka aliwaambia kuwa Lugumi na watendaji wake wamewasili eneo hilo, lakini kwa kuwa muda bado, wamekwenda ofisini kwa Mkurugenzi wa Kampuni ya Jambo Concept, Juma Pinto kwa ajili ya kusubiri muda ufike.

Katika hali ya kushangaza, Kisaka aliwakabili waandishi na kuwataka waondoke ukumbini, warudi saa 9:00 alasiri kwa sababu Lugumi na wenzake wana mazungumzo.

“Waandishi nawaomba muondoke mrudi saa 9, tena mzingatie muda ili tuwahi kumaliza tuendelee na majukumu mengine ya kazi,” alisema Kisaka.

Ilipofisa saa 9 mchana, alijitokeza Mhariri wa gazeti la Sauti Huru, Albert Kawogo na kuwaambia waandishi kuwa Lugumi amepata dharura, ameelekea mkoani Dodoma ambako ameitwa na viongozi wa Serikali na kuwataka wachukue taarifa iliyoandaliwa na waondoke eneo la mkutano.

Baada ya kusema hivyo, waandishi walimuuliza Kawogo, nani mwenye dhamana ya kujibu maswali ya waandishi yaliyoandaliwa kwa ajili ya Lugumi.

Akijibu, Kawogo alisema: “Hakuna mtu mwenye mamlaka ya kujibu maswali yanayomhusu Lugumi, nasisitiza mnapaswa kuondoka kwenye ukumbi, hakuna tena mkutano.

“Lugumi hawezi kuja tena kwenye mkutano huu, amepata dharura anakwenda Dodoma, ameitwa huko na viongozi wa Serikali, chukueni ‘press release’ muondoke, hakuna mkutano tena, mimi sina mamlaka ya kumjibia maswali yake, ndiyo maana ametoa press release, mtasoma humo.”

Alipomaliza kusema hayo, aligawa karatasi hizo kwa waandishi wa habari na kuondoka bila ya kutoa maelezo yoyote yanayohusu sakata hilo, hali iliyosababisha kujitokeza minong’ono ya waandishi wakihoji kwanini Lugumi hakutokea kwenye mkutano huo na Kawogo ni nani yake.

TAARIFA ILIYOTOLEWA
Taarifa iliyotolewa kwa vyombo vya habari na kusainiwa na Kaimu Mtendaji Mkuu wa Kampuni ya Lugumi, Juma Sabury, ilisema Lugumi hahusiki na tuhuma zinazoelekezwa kwake.

Kampuni hiyo inadaiwa kuingia mkataba na Jeshi la Polisi mwaka 2011 na kupewa zabuni ya kufunga mashine za kuchukua alama za vidole katika vituo 108 nchini kwa gharama ya Sh bilioni 37.

Lakini hadi sasa, kampuni hiyo imefunga mashine hizo katika vituo 14 tu Dar es Salaam na kulipwa Sh bilioni 34 ambazo ni sawa na asilimia 99 ya fedha zote.

Taarifa hiyo ya Sabury inasema kampuni hiyo imetekeleza mkataba huo kwa kushirikiana na wabia wao.
Alisema kama kuna mgogoro katika utekelezaji wa mkataba huo, jeshi hilo lilipaswa kuwasilisha taarifa ya malalamiko kwa Mwanasheria Mkuu wa Serikali (AG) ili aweze kuingilia kati.

“Kwa mujibu wa mkataba wetu, hatupaswi kujitokeza hadharani kulalamika, tunatakiwa kuwasilisha malalamiko yetu kwa Mwanasheria Mkuu wa Serikali (AG), siyo sisi wala jeshi hilo,” alisema Sabury.

Sabury alikiri mwaka 2011, kampuni hiyo iliingia mkataba na jeshi hilo kwa kufunga mitambo  ya utambuzi kwa kutumia alama za vidole katika vituo vya polisi nchi mzima, vikiwamo vya Tanzania Bara na Zanzibar.
“Mkataba huu tuliutekeleza kwa kushirikiana na wabia wetu katika kuhakikisha mitambo hiyo inafungwa kwenye vituo hivyo,” alisema.

Alisema kumekuwa na tuhuma nyingi zinazotolewa kwenye vyombo vya habari pamoja na mitandao ya kijamii zikimhusisha Lugumi kuwa ametoroka nchini na kuwataka wananchi kuzipuuza akidai ni fitina tu.

“Said Lugumi hajawahi kutoroka wala kukamatwa nje ya nchi, yupo anaendelea na majukumu yake kama kawaida, hizo taarifa zinazosambazwa si za kweli, ni huzushi na kwamba zinapaswa kupuuzwa,” alisema.

TAKUKURU NA LUGUMI
Jalada la mkataba tata wa Kampuni ya Lugumi Enterprises na Jeshi la Polisi limetua mikononi mwa Taasisi ya Kuzuia na Kupambana na Rushwa (Takukuru) kwa ajili uchunguzi zaidi.

Akizungumza na MTANZANIA juzi, Msemaji wa Takukuru, Tunu Mleli, alisema jalada la uchunguzi dhidi ya kampuni hiyo liko mikononi mwao na wakikamilisha watawasilisha kwenye mamlaka nyingine za kisheria kwa ajili ya hatua zaidi.
CHANZO: MTANZANIA

Ya Mwajuma na kina Msekwa

Pius Msekwa.

Na Ahmed Rajab.

KATIKA uhai wangu nimekutana mara moja tu na Pius Chipanda Msekwa. Sijui kama yeye anakumbuka. Kwa hakika, hana sababu ya kwa nini akumbuke au anikumbuke ingawa pengine hatopasahau nilipomkuta Jumatatu ya Machi 11, 2002 jua lilipokuwa limekwishatua.

Ama mimi siwezi kusahau mahala tulipokutana. Wala siwezi kumsahau.
Msekwa na mimi tulikutana sipo. Ninasema hivi hasa ukizingatia alikotoka na nilikotoka. Tulijikuta katika mazingira mageni yasiyo ya kawaida kwetu sote wawili, watoto wa visiwani — mtoto wa Ukerewe, Tanganyika, na mtoto wa Vuga, Zanzibar.

Tulikuwa katika ukumbi uliojaa mazulia kwenye Kasri ya Buckingham ya Malkia wa Uingereza, jijini London. Tulialikwa na Malkia Elizabeth katika hafla aliyoiandaa yeye na mumewe, Prince Philip, kuadhimisha miaka 50 tangu malkia huyo awe Mkuu wa Jumuiya ya Madola (Commonwealth).

Nilizungumza na Msekwa kwa muda mfupi baada ya kumkabili na kujitambulisha kuwa mhariri wa jarida la Africa Analysis. Yeye hakuwa na haja ya kujitambulisha kwani nilikwishamtambua Spika wa Bunge la Tanzania. Kama sikosei, siku hizo alikuwa anamaliza muda wake wa miaka mitatu wa kuwa mwenyekiti wa kamati ya utendaji ya Jumuiya ya Wabunge wa Jumuiya ya Madola (CPA).

Kazi kubwa ya Jumuiya hiyo ya CPA ni kuunga mkono jitihada za kupatikana utawala bora, demokrasia na kuheshimu haki za binadamu katika nchi za Jumuiya ya Madola. Mlezi wake ni Malkia wa Uingereza akiwa Mkuu wa Jumuiya ya Madola na ndio maana Msekwa alialikwa katika hafla ya kwenye kasri ya Buckingham.

Shughuli nyingine ya CPA ni kuandaa kila mwaka mkutano wa wabunge wa Jumuiya ya Madola.

Kwa hivyo, tunaweza kusema kwa uhakika kwamba Msekwa si mgeni wa dhana za utawala bora, demokrasia na haki za binadamu kwa vile amekuwa akihusika na dhana hizo katika kazi zake alipokuwa mmoja wa viongozi wa CPA.

Hata tukiiacha CPA, Msekwa lazima alikuwa akiyaelewa vizuri mambo yanayohusika na utawala bora na demokrasia kwa jumla.

Lakini labda kinachomchongea ni uzoefu wake wa kufanya kazi kwa muda mrefu ndani ya Chama cha Mapinduzi (CCM) na serikali yake akianzia na wadhifa wa Katibu wa Bunge. Wakati huo umri wake ulikuwa wa miaka 25.

Msekwa ametoka mbali na CCM toka uanaharakati wake ndani ya Chama cha Tanganyika African National Union (TANU) alikolelewa kisiasa na ambako alikuwa Katibu Mtendaji Mkuu akiwa na umri wa miaka 32. Alizipanda ngazi za chama mpaka akafika kuwa naibu mwenyekiti wa CCM. Aliwahi pia kuwa mwenyekiti wa kamati ya uchaguzi ya CCM. Kuna wenye kusema kwamba yeye si kigogo wa chama bali ni gogo lenye kuzikalia siri nyingi za CCM na za vigogo wenzake wa chama hicho.

Zaidi ya yote yeye ni msomi kuliko kuwa mwanasiasa mwenye kupigana vikumbo na wanasiasa wengine mitaani. Kwa hivyo, binafsi alinishangaza aliponukuliwa akisema kwamba Rais John Magufuli hana uwezo wa kikatiba kuingilia sakata la Zanzibar na kwa matamshi yake mengine yenye kuashiria kwamba anawatetea walioibaka demokrasia Zanzibar.

Tuseme ni kweli kwamba Dk. Magufuli hana nguvu hizo na tuombe iendelee kuwa hivyo kwamba Rais wa Jamhuri ya Muungano wa Tanzania hana mamlaka au uwezo wa kikatiba au wa kisheria kuingilia kati migogoro ya Zanzibar kwa sababu hatua kama hiyo ina mushkili wake kwa uhuru na uungwana wa Zanzibar.

Hata hivyo, kuna mambo ambayo Magufuli angeliweza kuyafanya. Angeshindwa kikatiba lakini kwa kuyatekeleza mambo hayo angelishinda kwa uadilifu au tuseme kwa utu.

La kwanza ambalo angeliweza kulifanya ni kuipaza sauti yake kukemea yaliyokuwa yakifanywa na watawala wa huko Zanzibar. Kadhalika asingetoa idhini ya majeshi kutoka Bara kupelekwa Zanzibar, hatua ambayo ilionekana na wengi kwamba ilikuwa na lengo la kuwatia hofu wananchi.

Hatua nyingine ambayo angeliweza kuichukuwa, kama yeye kweli ni mpenda haki aliyechoka na usanii wa chama chake, ni kukishinikiza chama hicho kisijiaibishe na kuliaibisha taifa pamoja naye mwenyewe kwa kulazimisha kwamba lazima kionekane kuwa kinaibuka na ushindi huko Zanzibar.

Tumeona kwamba Magufuli aliweza kuchukuwa hatua kama hiyo kuhusika na uchaguzi wa umeya wa Dar es Salaam.

Angelichukuwa hatua kama hizo kuhusu Zanzibar basi tungeamini ya kuwa kweli ana nia ya dhati ya kutukwamua hapa tulipo si kwa Zanzibar tu lakini kwa taifa zima. Kwa sasa hakuna ushahidi wa kuonyesha kwamba anayo nia ya kuijenga Tanzania mpya.

Tunachokishuhudia ni mbwembwe zenye kuuficha usanii unaoendelea ndani ya CCM. Ni usanii huo unaowafanya wengi wasiamini kwamba ndani ya chama hicho kuna kiongozi mwenye nia safi na mustakbali wa taifa hili.

Juu ya mbwembwe na vishindo vya Magufuli si Watanzania wote wanaoamini kwamba serikali yake kweli imeazimia kuijenga Tanzania mpya. Mmoja wa wasiohadaika na dhamira za CCM ni Mwajuma binti Kishana (silo jina lake la kweli). Yeye haamini kabisa kwamba mfumo wa utawala utabadilika chini ya uongozi wa CCM.

Kiasi aamini hivyo kwa sababu kwa vitendo na matamshi yao viongozi wa juu wa CCM wameuthibitishia ulimwengu kwamba wao ni watu wasio na insafu wala uadilifu, hususan kuhusu suala la Zanzibar. Hawanishangazi kwa wayafanyao na wayasemayo.

Wanaonishangaza na kunikanganya ni wapambe wao walio wasomi, kama Msekwa, na wale wasomi wetu ambao kama mimi wanafuata siasa za mrengo wa kushoto.

Kwa nini nao wakawa wanakosa uadilifu wanapolijadili sakata la Zanzibar? Nimekuwa nikijiuliza swali hilo kwa muda mrefu lakini bado sijapata jawabu yenye kuniridhisha.

Sidhani kwamba wasomi hao hawautambui ukweli au kwamba hawaamini, kwa mfano, ya kuwa haki haikutendeka pale watawala walipoufuta uchaguzi wa Zanzibar wa Oktoba 2015.

Wanalielewa hilo vizuri. Lakini wamehiyari kujipendekeza kwa watawala. Na ndio maana tunawaona wakijitolea wakiwa katika safu za mbele wakishika majembe, wakichimba makaburi na wakijaribu kuuzika ukweli, haki na demokrasia yetu iliyochanga.

Wako tayari kuzipuuza athari za kiuchumi ambazo zitaikumba Tanzania nzima kwa vitendo vya wachache vinavyolifanya taifa zima lijivunjie heshima yake.

Jambo moja wanalolifanya hawa watawala wetu na wasomi wao wenye kujaribu kuwakinga kwa hoja zao ni kuukimbilia uzalendo kwa kuuponda ubeberu.

Kuulaumu ubeberu na kuukimbilia uzalendo ni njia rahisi inayotumiwa na watawala wakishirikiana na baadhi ya wasomi kujaribu kuwapa wananchi sura isiyo ya kweli ya hali ya mambo ilivyo. Wakati huohuo huwa ni jaribio la kukataa kujikosoa kwa kuukanya ukweli.

Wanafikiri kuwa ni njia ya mkato ya kujitoa kimasomaso lakini kwa kweli huwa ni njia ya kujidanganya na kuuhadaa umma. Haitupi uelewa wa hali halisi ilivyo.

Wenye kufanya hivyo wanakuwa wanauficha udhaifu wao. Kadhalika wanakuwa wanawaacha na hawawajali watawala wa ndani ya nchi na maslahi yao.

Tabia nyingine mbaya waliyo nayo baadhi ya wasomi wetu, hasa wa mrengo wa kushoto na wale wenye kujitia kuuweka mbele uzalendo, ni yale mazoea yao ya ukasuku. Badala ya kuwa watu makini, wenye kupima mambo na kufanya uchambuzi halisi wa hali halisi ilivyo wasomi wa aina hii hupendelea kujifanya kasuku kwa kukariri kikasuku mawili matatu waliyoyaokota vitabuni.

Tunafanya kosa kubwa sisi wa mrengo wa kushoto tunapokuwa tunaidekeza hii hulka tuliyo nayo baadhi yetu ya kuukwepa ukweli unapotukabili usoni. Hali hii hujitokeza zaidi pale mahasimu zetu wa kiitikadi wa kutoka nchi za Magharibi wanapowafuma viongozi wetu wanapokuwa wanazipora haki za wananchi.

Nadhani hii ni moja ya sababu kwa nini wananchi wenzetu wasiofuata itikadi zetu za mikondo ya fikra za kushoto huwa wanatutoa maanani, wanatufanya watu tusio na thamani. Wakituangalia na kutusikiliza wanatushangaa na wanazidi kuwa baidi na sisi, kuwa mbali na fikra yetu.

Hawaelewi kwa nini tuwe tunajali ubeberu unapofanya njama za kuipora demokrasia, kwa mfano, nchini Venezuela na tukapuuza kama hakuna lililotokea pale watawala wetu wanapoipora demokrasia kwetu.

Sikatai kwamba ubeberu upo, u hai, ni muovu na unaendelea na njama zake za kuwanyonya wanyonge. Sikatai pia kwamba ulibirali mamboleo unaendelea kuzikoroga akili za wenye kutunga sera za nchi yetu, sera ambazo haziwezi kuwapatia wananchi maendeleo wanayostahiki kuyapata bila ya kuwaumiza kiuchumi.

Wala sikatai kwamba tunapaswa kuwa wazalendo na kuupiga vita ubeberu popote pale duniani unapojitokeza na mwisho sikatai kwamba tunawajibika kuzikosoa sera za ulibirali mamboleo kwani sera hizo, kwa jumla, hazina kheri nasi.

Ninachokikataa ni kuukimbilia uzalendo na kuufanya ngao ya kujihami kila serikali zetu zinaposhambuliwa na nchi za Magharibi kwa maovu ya serikali zetu wenyewe. Wenye kufanya hivyo wanaugeuza uzalendo na huufanya uwe kimbilio la waovu na wakorofi wa kisiasa wenye kuhalalisha madhambi ya kisiasa.

Kila wanapofanya makosa wakakosolewa au wanapodhulumu haki za wananchi na wakaambiwa kwamba wanadhulumu huanza kuwapaka tope wenye kuwalaumu na kuwasingizia kuwa eti wanatumiwa na watu wa nje wasiolitakia mema taifa.

Na kila watawala waovu wanapochukuliwa hatua na wafadhili wao huwakimbilia wananchi na kuwaambia wajikaze, wajitegemee, wawe wazalendo na wasikubali kushurutishwa na mataifa ya nje.

Sidhani kama hamna kabisa watu wenye busara ndani ya CCM kama Mwajuma anavyodhania ila, nafikiri, hao waliopo na wenye ujasiri wa kusema kweli ni wachache mno. Wengi wao wanakijali zaidi chama chao kushinda uzima wa taifa.

Rais Magufuli tumbua majipu lakini…(2)

Joseph Mihangwa

Joseph Mihangwa

Joseph Mihangwa

Rais wa Jamhuri ya Muungano wa Tanzania Dkt. John Pombe Magufuli akiteta jambo na Waziri Mkuu Mh. Kassim Majaliwa.

Na Joseph Mihangwa.

KATIKA sehemu ya kwanza ya makala haya wiki iliyopita, tuliona namna kampuni tata ya Meremeta “ilivyoingia” nchini kwa ubunifu wa vigogo wa serikali na Benki Kuu na hatimaye kuchota kijanja mabilioni ya fedha na “kutoweka” kwa “kusindikizwa” na vigogo hao hao wa serikali.

Utata huo, kama tu ulivyokuwa utata wa kampuni ya Richmond iliyochota mabilioni ya fedha kwa mfumo unaofanana, ulitokana na madai ya kampuni hiyo kusajiliwa nchini Uingereza na madai mengine ya kusajiliwa nchini mwetu na kwa kisingizio cha kufanya kazi kwa mwavuli wa Jeshi la Wananchi wa Tanzania (JWTZ) na hivyo kujengewa mazingira ya kuhitaji usiri wa kiusalama ili isiguswe kwa utapeli huo na hujuma kwa nchi.

Baada ya kukomba dhahabu yote huko Buhemba na Buhemba Kusini, Nyamongo na Magunga, mwaka 2006, Meremeta ilitangazwa kuwa ilikuwa inafanya kazi kwa hasara na ikaundwa tume ya serikali ya watu watano, kuchunguza matatizo ya kampuni hiyo.

Wazito na waheshimiwa waliokuwa katika Tume hiyo, ni Daudi Balali – Gavana wa BoT na Mwenyekiti wa Tume; Gray Mgonja, aliyekuwa Katibu Mkuu Wizara ya Fedha, na Patrick Rutabanzibwa, wakati huo Katibu Mkuu wa Wizara ya Nishati na Madini.

Wengine walikuwa ni Mabwana Vincent Mrisho, Katibu Mkuu, Wizara ya Ulinzi na Jeshi la Kujenga Taifa; Andrew Chenge, Mwanasheria Mkuu wa Serikali, na Bwana Michael G. Garner, kama mshauri huru wa tume, ambaye alikuwa pia ndiye Mshauri wa Benki ya Nedbank, yenye uhusiano na kampuni ya Nedcor Trade Service, iliyochota bilioni 155/- kutoka Benki Kuu katika mazingira ya kutatanisha.

Tume hiyo ilipendekeza kusitishwa kwa shughuli za kampuni ya Meremeta za kununua dhahabu kutoka kwa wachimbaji wadogo, jukumu ambalo tayari ilikwishalitelekeza tangu mwaka 2003, na kujiingiza katika uchimbaji na umiliki wa migodi.

Tume ilipendekeza pia kuanzishwa kwa kampuni mpya yenye jukumu la kusimamia na kuendesha Mgodi wa Buhemba yenye kumilikiwa na serikali kwa asilimia 100. Kwa lugha nyingine ni kwamba, baada ya kung’atuka kwa Meremeta, serikali iliamua kusimamia yenyewe mradi huo wa dhahabu kupitia chombo au taasisi teule.

Na kwa uzito wa mapendekezo ya tume hiyo ya Balali, Meremeta ilifilisiwa, ambapo mali na madeni yake yalichukuliwa na kampuni mpya ya “Tangold,” inayodaiwa kumilikiwa na serikali kwa asilimia 100. Na ingawa Meremeta ([halisi) ilifungwa rasmi mwaka 2006 nchini Uingereza, shughuli zake hazikukoma nchini Tanzania wakati huo, kama tutakavyoona baadaye katika makala haya.

Hapa kuna utata mwingine, kwamba kumbukumbu zinaonesha kuwa kampuni ya Tangold ilianzishwa katika Visiwa vya Mauritius, Aprili 4, 2005; na kupewa Leseni ya Biashara Aprili 8, 2005 kama kampuni binafsi. Lakini kumbukumbu zingine zinaonesha kuwa, Tangold ilifungua Akaunti ya Benki Namba 011103024852, Tawi la Corporate Drive la NBC, Dar es Salaam, Januari 1, 2003; kabla hata Tume ya Balali na wenzake haijaundwa kutatua tatizo la Meremeta.

Taarifa zingine zimeonesha zaidi kuwa kampuni hiyo ni ya kigeni iliyosajiliwa nchini Mauritius na kupewa leseni nchini Tanzania, Februari 20, 2005 kama Tawi la Kampuni ya kigeni; na ilianza kupatiwa fedha na BoT Agosti 1, 2005 kwa kazi isiyojulikana.

Je, ina maana kwamba Tangold ilikuwapo nchini Tanzania kabla ya kuanzishwa nchini Mauritius mwaka 2005, au ni aina fulani tu ya usanii? Hata kama ilikuwapo, iliwezaje kufungua akaunti benki, Januari 1, 2003 ambayo ilikuwa Sikukuu ya Kitaifa ya Mwaka mpya?

Kama ilikuwapo, kwa nini tume ilipendekeza kuundwa kwa kampuni ambayo tayari ilikuwapo? Nini tofauti kati ya Tangold iliyofungua akaunti Januari 2003, na Tangold iliyosajiliwa Mauritius April 4, 2005 kurithi Meremeta?

Ingawa mapendekezo ya tume na tamko la serikali yalikuwa kwamba kampuni hiyo mpya (Tangold) imilikiwe kwa asilimia 100 na serikali, utekelezaji wake ulikuwa ni kinyume chake; ambapo inaelekea wajumbe wa tume iliyoundwa kuchunguza matatizo ya Meremeta, ndio waliogeuzwa kuwa wakurugenzi wa kampuni hiyo mpya.

Hao wanatajwa (kwa baadhi majina yao kuongezwa herufi moja ya katikati), kuwa ni Daudi Balali, Gray S. Mgonja, Andrew Chenge, Patrick J. W. Rutabanzibwa na Vicent F. Mrisho.

Inawezekana, kwa mtazamo wa enzi hizo na kwa kusudi hilo, kwamba hao watano ndio walikuwa serikali yenyewe; lakini kifungu cha saba (7) cha Katiba ya Kampuni ya Tangold kinatibua dhana yote hiyo, kinaposema, “Wenye hisa ya kampuni wanaweza kurithisha hisa zao kwa ndugu zao”.

Je, ni kweli Tangold ilikuwa inamilikiwa na serikali kwa asilimia 100 kama ilivyopendekeza Tume ya Balali na pia kwa mujibu wa tamko la serikali? Ni ndugu wapi hao wa serikali (kama kweli serikali ina ndugu!) waliostahili kurithishwa hisa za serikali?.

Haya ni maswali magumu, na tunashawishika kuamini kwamba, Tangold haikumilikiwa na serikali kwa asilimia 100 kama tulivyoambiwa bali ilikuwa kampuni binafsi iliyorithishwa mali za Kampuni ya Meremeta.

Wakati matatizo ya Meremeta yakiendelea na wakati huohuo tayari mapendekezo ya Tume ya Balali ya watu watano yakiwa yameanza kufanyiwa kazi, Machi 18, 2004, iliundwa kampuni nyingine iitwayo “Deep Green Finance” (DGF) ambayo madhumuni na shughuli zake hazijafahamika vizuri mpaka sasa.
Wakurugenzi wa DGF walikuwa ni Mark Ross Weston wa New Zealand; Antón Taljaard wa Afrika Kusini, na Rudolf Van Schalkwyk, pia wa Afrika Kusini.

Wanahisa wa DGF walitajwa kuwa ni Protase R. G. Ishengoma, Stella Ndikimi wa Kampuni ya uwakili ya IMMA, ya jijini Dar es Salaam; Benki ya Nedbank Africa Investment Ltd ya Afrika Kusini (ambayo Mshauri wake, Bwana Michael G. Garner, ndiye pia aliyekuwa mshauri huru wa Tume ya watu watano, iliyochunguza matatizo ya Meremeta na kupendekeza kuundwa kwa Tangold), na kampuni ya SBM Nedcor Holdings, ambayo haijafahamika bado, kama ina uhusiano wowote na kampuni ya Nedcor Trade Service, iliyolipwa na BoT malipo tata ya zaidi ya Sh. 155bn/= kwa niaba ya Meremeta.

Wakurugenzi hao watatu wa Deep Green Finance, pia ndio waliokuwa maafisa wa NedBank; na jina la Deep Green limetumiwa mara nyingi na NedBank katika miradi yake ya kijamii.

Haifahamiki pia ni kwa vipi na kwa njia ipi, Watanzania pekee wawili, Protase Ishengoma na Stella Ndikimi, walitembelewa na ngekewa ya kununua hisa za kampuni yenye kumilikiwa na wageni kama hii (DGF); na kama ni kweli inavyodaiwa, kwamba hatimaye walichukua hisa (kwa njia ya kuhamishia au kununua) katika Nedbank Ltd na Nedbank Africa Investments, Aprili 15, 2004.

Kama ilivyokuwa kwa kampuni ya Tangold, iliyofungua akaunti siku ya sikukuu ya mwaka mpya; ndivyo ilivyokuwa pia kwa kampuni ya Deep Green Finance, iliyofungua akaunti Benki ya NBC, Na. 011103024840, Tawi hilo hilo la Corporate Drive; safari hii ilikuwa sikukuu (ya mapunziko) ya Mei Mosi, 2004.

Kuna utata kuhusu utoaji wa namba za akaunti za benki hiyo, kwamba akaunti ya Tangold, Namba 011103024852, iliyofunguliwa Januari 1, 2003, ni kubwa (kwa akaunti 12 zaidi), ikilinganishwa na akaunti Namba 01110302840 ya Deep Green Finance, iliyofunguliwa zaidi ya mwaka mmoja baadaye, Mei 1, 2004.

Je, ni utaratibu wa NBC kutoa namba za akaunti kuanzia na namba za juu, kushuka chini? Kama sivyo, basi kuna uwalakini unaotufanya tuamini kwamba kulikuwa na mchezo mchafu, ikizingatiwa pia kwamba akaunti zote mbili zilifunguliwa siku za mapumziko ya Sikukuu za Kitaifa.

Toka Mei 1, 2004 akaunti ya Tangold ilipofunguliwa, hadi Julai 31, 2005 (zaidi ya mwaka mmoja), hapakuwa na shughuli za DGF zilizoingiza fedha katika akaunti hiyo, hadi Agosti 1, 2005 ilipoanza kupokea mabilioni ya fedha kutoka ama benki Kuu, Deep Green Finance au Tangold, kwenda ama Deep Green Finance, Tangold, Meremeta, IMMA Advocates au kusikojulikana.

Wakati tunaelezwa kwamba Tangold ilianzishwa April 5, 2005 na kupewa leseni ya biashara April 8, 2005 kuchukua nafasi ya Meremeta, na mali na madeni ya Meremeta kuhamishiwa au kuchukuliwa na kampuni mpya, kwa maana kwamba Meremeta ilikuwa imefilisiwa na kufungwa.

Lakini kumbukumbu zinaonesha kwamba, Oktoba 12, 2005, jumla ya Shs. 1,690,500,000 zilihamishwa kutoka Tangold kwenda kampuni (mfu?) ya Meremeta; na vivyo hivyo Novemba 23, (Tshs. 555,300,048/=) na Desemba 12 kiasi cha Shs. 551,060,000. Iliwezekanaje Meremeta kulipwa fedha hizo wakati ilikwishafilisiwa? Nani aliifufua?

Kwa kifupi, kati ya Agosti 1, 2005 na Desemba 21, 2006, jumla ya Sh. 32bn/= zilihamishwa kutoka Benki Kuu kwenda Deep Green Finance na Tangold; mbali na zile zilizopelekwa kusikojulikana.

Tunashawishika kuamini kwamba Deep Green Finance iliundwa kurahisisha na kuhakikisha utoroshaji wa fedha za Meremeta na Tangold kwenda nje ya nchi na si kwa sababu nyingine yoyote ile.

Baada ya purukushani hizo, na kuonekana kwamba mradi wa Tangold hauwezi kuendelea, serikali iliuza haki za mgodi huo kwa kampuni ya “Rand Gold” ya Afrika Kusini, kwa bei ya chini ya soko, na kusababisha hasara ya dola za Kimarekani milioni 100; na pia kulipa dola miliono 132 pamoja na adhabu na riba, kutokana na Serikali (BOT) kudhamini wakopaji/wawekezaji waliofilisika na kutupa mzigo kwa serikali kuyalipa.

Purukushani hii, toka kuundwa kwa kampuni ya Meremeta, hadi kuundwa na kufilisika kwa kampuni ya Tangold, licha ya kuruhusu uporaji mkubwa wa mabilioni ya fedha na rasilimali zetu, ilisababisha pia hasara ya jumla ya dola za Kimarekani milioni 232, sawa na Shs. 232bn/= wakati huo, kwa njia ya kifisadi.
Serikali ya Awamu ya Tatu, ya Rais Mkapa ilifanya malipo hayo Oktoba 2005, mwezi mmoja tu kabla ya kumaliza muda wake wa kuwa madarakani.

Na ndivyo hivyo awamu hiyo ya tatu ilivyolipa pia kwa malipo tata ya kashfa ya EPA, 133bn/= mwishoni mwa Oktoba 2010. Na vivyo hivyo Serikali ya awamu ya nne ilivyolipa malipo tata ya 326bn/= kutoka akaunti ua “Tegeta Escrow” kwa kuporwa na Kampuni ya PAP, miezi kadhaa kabla ya kumaliza kipindi chake.

Utamaduni huu wa kupora dakika za mwisho kwa watawala utadumu hadi lini?.