Dk Shein: Tanzania inaunga mkono mpango wa hifadhi ya mazingira wa visiwa vya ukanda wa magharibi wa bahari ya hindi

Rais wa Zanzibar na Mwenyekiti wa Baraza la Mapinduzi Dk.Ali Mohamed Shein,akitoa hutuba yake katika Uzinduzi wa Mpango wa Magharibi ya Bahari ya Hindi ya Changamoto za Ukanda wa Pwani na mabadiliko tabianchi jana katika Orator Hotel,Apia Samoa ambapo Mkutano wa Tatu wa Kimataifa wa Nchi za Visiwa unaendelea.

Tanzania imewahakikishia wanachama wa Mpango wa Magharibi ya Bahari ya Hindi wa Changamoto za Ukanda wa Pwani na Mabadiliko ya Tabianchi kuwa inaunga mkono mpango huo kwa kuwa inaamini kuwa mpango huo ni chombo muafaka katika kuleta maendeleo endelevu katika eneo hilo.

Akizungumza katika uzinduzi wa mpango huo uliofanyika jana mjini Apia katika visiwa vya Samoa, Rais wa Zanzibar na Mwenyeiti wa Barala la Mapinduzi Dk. Ali Mohamed Shein alisema mpango huo unatoa fursa kwa washiriki kufanyakazi kwa pamoja katika kukabiliana na changamoto zinazosababishwa na mabadilko ya tabianchi.

“changamoto tunazokabiliana nazo zinafanana na ni sahihi kufanyakazi pamoja kukabiliana nazo. Mpango huu ni wa manufaa sana katika eneo letu” alieleza Dk. Shein na kusisitiza kuwa katika hali hiyo “Tanzania tunauunga mkono kikamilifu”

Katika hotuba yake fupi kwenye hafla hiyo Dk. Shein ambaye yupo hapa pia kumuwakilisha Rais Jakaya Mrisho Kikwete katika Mkutano wa Tatu wa Kimataifa wa Nchi za Visiwa unaoendelea sasa alieleza pia umuhimu wa taasisi za kikanda za maeneo ya visiwa kusimama pamoja na kuwa na msimamo mmoja katika mkutano huo ili uweze kuweka msingi madhubuti wa ushikiriano.

Alibainisha kuwa kufanyika kwa uzinduzi wa mpango huo sambamba na mkutano wa nchi za visiwa wenye kuhimiza maendeleo endelevu ni fursa nyingine kwa nchi wanachama wa mpango huo kufanya masuala yao kueleweka miongoni mwa jumuiya ya kimataifa.

Aliongeza kuwa ushiriki wa wadau wengi katika uzinduzi wa mpango huo ni ishana kuwa mpango huo umepokelewa vyema na wadau hao wako tayari kushirikiana na wanachama kutekeleza malengo ya mpango huo.

Hata hivyo alihimiza mpango huo kuchukua hatua za haraka kutekeleza programu zake za kukabiliana na changamoto za mabadiliko ya tabianchi kwa kuwa muda hausubiri hivyo kila wakitekeleza mapema itakuwa ni manufaa zaidi kwa uhai na ustawi wa ukanda wa magharibi wa bahari ya Hindi.

Katika hotuba yake hiyo Dk. Shein pia aliwasilisha salamu za Rais Kikwete kwa viongozi waliohudhuria hafla hiyo ya uzinduzi ambayo ilihudhiriwa na viongozi mbalimbali wa nchi za visiwa kutoka pande zote za dunia.

Miongoni mwa viongozi walihudhuria na kupata fursa ya kuzungumza ni pamoja na Rais wa Visiwa vya Palau Tommy E. Remengesau Jr., Rais wa Serikali ya Shirikisho la Visiwa vya Micronesia Emanuel Mori na Rais wa visiwa vya Marshall Christopher Loeak.

Wengine ni Waziri Mkuu wa Samoa Tuilaepa Lupesoliai Sailele Malielegaoi, Waziri Mkuu wa Grenada Dr. Keith Mitchell, Waziri wa Mambo ya Nje wa Seychelles Jean-Paul na Naibu Waziri wa Mambo ya Nje wa Italia Lapo Pistelli.

Mpango wa Magharibi ya Bahari ya Hindi wa Changamoto za Ukanda wa Pwani na Mabadiliko ya Tabianchi ni mkakati mpya wa kiutekelezaji miongoni mwa nchi za visiwa vidogo vya eneo la ukanda wa Magharibi mwa Bahari ya Hindi katika kusimamia malengo ya maendeleo endelevu kwa nchi hizo.

Malengo makubwa Mapango huo yamejikita zaidi katika uhifadhi na usimamizi wa pamoja wa mazingira ya visiwa, fukwe, na bahari zake pamoja na mabadiliko ya tabianchi.

Visiwa vinavyoshiriki mpango huu ni pamoja na Shelisheli, Comoro, Mauritius, Reunion na Zanzibar.

Hatima ya Bunge la Katiba mikononi mwa JK

Rais Jakaya Mrisho Kikwete.

Dodoma. Hatima ya Bunge Maalumu la Katiba imebaki mikononi mwa Rais Jakaya Kikwete, ambalo limemwandikia barua kiongozi huyo wa nchi kutaka ufafanuzi wa kisheria kuhusu tarehe ya mwisho ya kumaliza vikao vyake.

Hiyo ni kutokana na muda uliopangwa kwenye ratiba ya bunge hilo kuzua utata wa kisheria na kuwapo uwezekano wa mwingiliano na Bunge la Jamhuri ya Muungano na Baraza la Wawakilishi (BLW), Zanzibar.

Ratiba ya Bunge Maalumu la Katiba inaonyesha kuwa limepanga kuhitimisha vikao vyake mwishoni mwa Oktoba, tofauti na tarehe iliyotolewa na Rais Jakaya Kikwete Julai 28, mwaka huu ambayo ilitangazwa katika Gazeti la Serikali (GN) namba 254 la Agosti Mosi.

Tangazo la Rais linaonyesha kuwa awamu ya pili ya Bunge Maalumu ingeanza Agosti 5, 2014 na kumalizika Oktoba 4, lakini ratiba ya Bunge hilo inaonyesha kuwa litamalizika Oktoba 31, siku ambayo mwenyekiti wa Bunge hilo atakabidhi kwa Rais Katiba inayopendekezwa.

Hata hivyo, uchunguzi wa gazeti hili umebaini kuwa hadi sasa Serikali bado haijatoa tangazo (GN) lingine kuongeza muda hadi mwishoni mwa Oktoba kama alivyosema Mwenyekiti wa Bunge Maalumu, Samuel Sitta wakati akitoa ufafanuzi wa siku 60 zilizotengwa kwa ajili ya Bunge hilo, Agosti 5 mwaka huu.

Sitta alisema kwa kadiri ya tafsiri, siku za kazi ni Jumatatu hadi Ijumaa ambazo wajumbe wanapaswa kufanya kazi na kwamba Jumamosi na Jumapili siyo sehemu ya siku 60 zilizoongezwa na Rais.

Hata hivyo, Katibu wa Bunge Maalumu, Yahya Khamis Hamad alisema hadi sasa hawajapata maelekezo ya ziada kutoka serikalini ambako waliandika barua ya kuomba ufafanuzi wa kisheria kuhusu suala hilo.

“Tulimwandikia barua, Katibu Mkuu Kiongozi (Ombeni Sefue) kuomba ufafanuzi wa siku hizo kama ambavyo sisi tungependa iwe, lakini hadi sasa bado hatujajibiwa lakini bado siku zipo nadhani tutajibiwa tu wakati mwafaka,” alisema Hamad ambaye pia ni Katibu wa Baraza la Wawakilishi.

Sefue alikiri ofisi yake kupokea barua kutoka Bunge Maalumu ikiomba ufafanuzi ambao ungeliwezesha kuongeza siku kwa lengo la kukamilisha kazi ya kujadili na kuandika Katiba inayopendekezwa na kwamba maombi yao bado yanafanyiwa kazi.

“Bado tuna muda wa kutosha tu, ni kweli tulishayapokea maombi ya Bunge Maalumu kuhusu suala hilo na Mheshimiwa Rais akikamilisha kazi yake watajulishwa tu,”alisema Sefue.

Utata wa kisheria

Licha ya ahadi iliyotolewa na Sitta ni dhahiri kwamba suala hilo lina utata wa kisheria kutokana na kauli iliyowahi kutolewa na Mwanasheria wa Serikali (AG), Jaji Frederick Werema wakati akitoa ufafanuzi wa maana ya siku 70 ambazo Bunge lilikaa mara ya kwanza.

Baada ya kusoma hati ya Rais ya kuitishwa kwa Bunge hilo, Februari mwaka huu, Jaji Werema alisema siku 70 zilizotolewa kwa mujibu wa tangazo la Serikali ni za kikalenda na siyo siku za kazi kwa sababu wajumbe wa Bunge Maalumu siyo watumishi wa kuajiriwa.

Maelezo ya Jaji Werema yalitokana na swali lililoulizwa na Mjumbe wa Bunge Maalumu, Ezekiah Oluoch ambaye alitaka ufafanuzi huo kutokana na siku zilizotengwa kuonekana kwamba ni chache na zisingetosha kukamilisha kazi ya kutunga Katiba.

Kauli ya Jaji Werema haijawahi kutenguliwa na Mahakama au yeye mwenyewe na kwa msingi huo, kwenda kinyume chake ni kuvunja Sheria ya Kazi na Majukumu ya Mwanasheria Mkuu wa Serikali, Sura ya 268 ya 2005.

Vifungu vya 22 (1) na (2) vya sheria hiyo vinazungumzia ushauri wa kisheria wa Mwanasheria Mkuu wa Serikali kuhusu suala lolote analotakiwa kulitolea ufafanuzi, wakati Kifungu cha 23 (1) kinasema ushauri huo unabaki kuwa msimamo wa Serikali katika suala husika, vinginevyo ubatilishwe ama na Mahakama au na AG mwenyewe katika utekelezaji wa wajibu wake.

Jana katika maelezo yake, Katibu Mkuu Kiongozi, Sefue alisema Jaji Werema alikuwa sahihi katika tafsiri aliyoitoa kuhusu siku zilizotolewa na Rais wakati wa awamu ya kwanza ya Bunge Maalumu.

“Jaji Werema yuko sahihi kabisa, kwa hiyo hata Rais atakapokuwa akitoa majibu ya maombi yaliyofikishwa kwake kuhusu nyongeza ya siku atazingatia sheria za nchi,” alisema.

Bunge la Muungano na BLW 
Mgogoro mwingine unaojitokeza ni ratiba za vikao vya Bunge la Muungano ambalo limepangwa kuanza Novemba 4, 2014 na Baraza la Wawakilishi ambalo limepangwa kukutana kuanzia Oktoba 22, mwaka huu.

Kwa kawaida, vikao vya Bunge hutanguliwa na wiki mbili za vikao vya kamati za kudumu na ikiwa ratiba itabaki kama ilivyo, basi vitaingiliana na vikao vya Bunge Maalumu ambalo ratiba yake imepangwa kuendelea hadi Oktoba 31, mwaka huu.

Katibu wa Bunge la Muungano, Dk Thomas Kashililah alisema vikao vya Kamati za Bunge hilo vinatarajiwa kuanza Oktoba 13, mwaka huu kutokana na kuwapo kwa miswada mingi ya Serikali inayopaswa kufanyiwa kazi.

“Tuna miswada ya Serikali kama 12 hivi ambayo mingine imekaa muda mrefu, kwa hiyo kamati zetu nyingi zinapaswa kukutana mapema ili kuifanyia kazi vinginevyo tutakwama,” alisema Dk Kashililah ambaye pia ni Naibu Katibu wa Bunge Maalumu.

Alipoulizwa kuhusu mwingiliano wa ratiba baina ya taasisi hizo mbili ambazo yeye ni mtendaji wake, Dk Kashililah alisema suala hilo litatafutiwa ufumbuzi kabla ya muda huo kuwadia.

“Nadhani wakati tunafikiria suala la muda wa Bunge la Katiba, hatukufikiria ratiba hizi nyingine, kwa hiyo ni dhahiri kwamba pengine tutalazimika kuangalia jinsi ya kutoka hapo,” alisema.

Naibu Spika wa Bunge la Muungano, Job Ndugai mwishoni mwa wiki iliyopita alisema kwa jinsi ratiba ya Bunge Maalumu ilivyopangwa lazima itaingilia shughuli za Bunge la Muungano, hivyo uamuzi unapaswa ufanywe ili kuepusha mgongano huo.

“Sisi tumeishaliona hilo kwamba ni changamoto, tulikuwa tukijaribu kujadiliana kuona kama baadhi ya vikao vya kamati vinaweza kuanza mapema hapa Dodoma, lakini uamuzi bado haujafanyika,” alisema Ndugai.

Naye Hamad alikiri kwamba kalenda ya vikao vya Baraza la Wawakilishi inaingiliana na ratiba ya Bunge Maalumu na kwamba wanafikiria jinsi ya kuondoa kasoro hiyo.

“Kuna njia nyingi za kuondoka hapo, pengine tunaweza kumwomba Rais asogeze mbele vikao vya Baraza la Wawakilishi kwa wiki mbili, maana hiyo inaruhusiwa kwa mujibu wa Katiba. Hata hivyo, tutalifanyia kazi ili kufahamu jinsi ya kulitatua,”alisema Hamad.

Akizungumzia changamoto hiyo ya mwingiliano wa ratiba za kazi za taasisi hizo, Balozi Sefue alisema jambo hilo ni miongoni mwa yatakayozingatiwa wakati wa kufanya uamuzi.

“Tutakapokuwa tunafanyia kazi suala hilo, tutazingatia hayo yote na tutahakikisha kwamba hakutakuwa na mwingiliano wa aina yoyote,” alisema Sefue.

CHANZO: MWANANCHI.

Wafungwa waiomba Serikali kuwatafutia adhabu mbadala kupnguza msongamano

Nembo ya Jeshi la Magereza.

Na Maulid Kipevu

Wanafunzi wa Chuo cha Mafunzo (Wafungwa) na  Mahabusu wameiomba Serikali kutafutiwa adhabu mbadala za kutumikia jamii  kwa wanafunzi wanaopatikana na hatia kwa makosa madogo madogo ili kupunguza msongomano  wa  wanafunzi pamoja na  Mahabusu gerezani .

Wakizungumza  katika ziara ya Mahakimu wa Mahakama  huko kiinua miguu Kilimani  Zanzibar mwanafunzi  Muhammed Hamza  kwaniaba ya wezake amesema katika kuzingatia haki za binaadam yako makosa mengi ambayo Serikali ingalikaa na kuyatizama upya na kuyatafutia adhabu zitakazolingana na makosa hayo.

Hamza aliyataja baadhi ya makosa hayo kuwa ni wizi wa mazao,  kuku ambapo alitoa mfano wa nazi mbili mtu anawekwa rumande miezi sita wakati kifungo chake  inawezekana ikawa miezi miwili na mengine kama hayo.

Mwanafunzi huyo  alitaja  kutokuwepo kwa usawa wa sheria na kudai kwamba  mara nyingi kunakuwa na viashiria vya rushwa katika upatikanaji wa haki na chuo cha mafunzo ni sehemu ya asokuwa nacho na mwenye nacho  hastahiki, Sheria kutizama upande mmoja na mwengine kutofanyakazi wakati sheria haina mkubwa.

Alisema  kuhusu upatikanaji wa mwenendo wa kesi mara zinapomalizika kwa kesi bado limekuwa tatizo sugu  na kuchukuwa  muda mrefu na hata waombaji kukata tamaa  ya kukosa haki zao za msingi kupitia Mhimili huo wa Mahakama.

Kuhusu utaratibu wa upatikanaji wa  dhamana  ya rufaa  kwa  wanafunzi (wafungwa) wanaohukumiwa adhabu gerezani kuwa bado ni shida kupatikana wakati sheria ipo mtuhumiwa anaweza kubaki  njee hadi rufaa yake  yake  itakapomalizika.

Akizungumzia  dhamana za kawaida kwa kesi zilizopo Mahakamani  Washitakiwa waliopo Rumande wamedai kuwa upo ubaguzi  kwa  wazanzibari  na wazanzibara  na vigezo  wanavyowekewa  ni vile ambavyo vinalenga kuwapa adhabu na sio haki za kisheria zilivyo.

Muhammed Hamza  akitoa  baadhi ya mifano kuwa  kutolewa dhamana  kwa Mansoor Yussuf Himid kwa kosa aliloshitakiwa nalo na wengine kubaki  mahabusu kwa  makosa ya aina moja ni ubaguzi,  kutakiwa wadhamini  watumishi wa Serikali wakati mwengine kunawanyima haki watuhumiwa  walio wengi  ambao  hawana jamaa ambao ni watumishi wa serikali.

Madai mengine  yaliyotolewa ni kuchelewa kwa kuanza kwa kesi Mahakamani  na Mahakimu kutofanyakazi siku za Ijumaa wakati Mahabusu wanateseka gerezani na utaratibu wa kuwaita mashahidi hauko  mzuri  na kuchangia kesi kuwepo  kipindi kirefu.

Gangira  Charles  ambae ni Mahabusu  alitilia mkazo  suala la haki ya dhamana kwa watuhumiwa  na kunukuu  Nakala ya  gazeti  la Mwananchi  lililoandikwa kesi ya aliyekuwa Waziri wa SMZ  Mansoor Yussuf Himid  kupewa dhamana kwa kosa aliloshitakiwa nalo na wengine kubaki  mahabusu  kesi nyengine  ni kesi za dawa za kulevya ambazo  watuhumiwa wanamaliza Miaka bila kesi zao kumalizika  kwa wakati  na watuhumiwa  kukaa ndani zaidi ya mwaka mmoja.

Gangira   alishauri kwa Serikali kuandaliwa  utaratibu  utakaowezesha  kesi zikasikilizwa kwa wakati ili haki zipatikane  kwa wenye haki  tena kwa wakati na dhamana zikitolewa kisheria mrundikano gerezani utaisha  na Serikali haitakuwa na mzigo wa kuhudumia watu ambao wanaweza  kuchangia kwa kiasi kikubwa  maendeleo ya taifa kwa kufanyakazi na kulipia kodi.

Wanafunzi hao wa rumande  wakizungumzia  vitendo vya  unyanyasaji  dhidi ya  Watuhumiwa  wanapokamatwa na kufikishwa  vituo vya Polisi  wamedai kufanyiwa vitendo ambavyo haviendani na haki za binaadamu  pamoja  na kupoteza  mali zao ambazo wanaziweka  Polisi.

Gangira  alisema kuwa vitendo vingine wanavyofanyiwa Polisi  ni mateso  bila ya kupatiwa matibabu wanapopata majeraha na vitendo vya udhalilishaji kinyume na haki za binaadamu.

Aidha   wamemuamba mrajisi wa Mahakama  kuandaa utaratibu wa Kamishna wa Polisi Zanzibar kutembelea  gerezani  na watendaji wake  kusikia kilio chao ili kuweza kupatiwa ufumbuzi  utakaosaidia kupatikana kwa haki.

Mahabusu  hao kwa pamoja wametaja matarajio yao makubwa ya kufanyiwa kazi malalamiko yao ili kuona  kilio chao cha muda mrefu kinaisha na sheria kufuata mkondo wake na wamesema  hawana lengo la kujenga chuki kati ya watendaji hao na Mahakimu  lengo lao ni kujenga  misingi imara ya kuendeleza kazi zao.

Akijibu baadhi ya malalamiko ya Wanafunzi(Wafungwa) na Mahabusu  Mrajis wa Mahakama Kuu  Georg Kazi  alisema ziara yao wamejifunza mambo mengi  ikiwemo kuona hali halisi ya Wafungwa na Mahabusu  wanavyoishi  gerezani.

Mrajis alisema amepokea malalamiko yao na atayafanyia kazi ambapo kuhusu dhamana ya Mansoor  kuwa  imefunguwa mlango kwa watuhumiwa wengine  kutumia kifungu cha 150(4) kuomba dhamana na wao waone Mahakama itafanyaje kutokana na kifungu hicho hakijawahi kutumiwa hapa Zanzibar na Mansoor  ameanza na wengine wafanye.

Kuhusu malalamiko ya shutuma kwa Mahakimu na kujihusisha na vitendo vya rushwa  na kutotenda haki ameahidi kulifanyia kazi kuyaondosha malalamiko hayo  na suala la dhamana litaangaliwa, kupatikana kwa mwenendo wa kesi  Proceed  amesema tatizo ni miundombinu  finyu kunachangia kuchelewa lakini tayari tatizo hilo linafanyiwa kazi.

Georg Kazi  amewaomba  kuisaidia Mahakama ili kuzimaliza changamoto ambazo zipo na kuonekana kuwa ni kero kwa jamii ambapo Wanafunzi(Wafungwa) na Mahabusu   ndio wadau wakuu ambao wanazifahamu  kasoro  zilizokuwepo.

Amewataka  kupeleka malalamiko yao wale ambao kwa muda mrefu kesi zao hazijatolewa hukumu na tayari    zimemalizika na kwa muda hazijatolewa hukumu.

Awali  Kamishna wa Vyuo  vya Mafuzo  Khalifa Haji Chum alisema ujio wa Mahakimu kutasaidia kuleta ufanisi  na mashirikiano katika taasisi hizo muhimu ambazo zimebeba jukumu kubwa la  kusimamia sheria za nchi.

Kamishna Khalifa  amesema  ziara za watendaji wanaohusika na moja ya majukumu yao kunasaidia kuona wapi  kwenye mapungufu  na kuyafanyiakazi  ili kudumisha amani katika nchi  ambayo  ndio dira ya maendeleo.

Mapema  Msaidizi Kamishna wa Vyuo vya Mafunzo  Haji Vuai Usi  alisema wapo wanafunzi 169  na Mahabusu 234 wakiwepo  mfungwa mmoja mwanamke na watano mahabusu, watoto watano.

Nao  Mahakimu waliotembelea  gereza kuu la Kiinua Miguu wamesema  wamejifunza mambo mengi katika ziara hiyo  na kuiomba serikali  kutoa ushirikiano wa kutosha  kwa taasisi hizi ili kupunguza au kuondosha kabisa matatizo  yaliyopo ikiwemo miundombinu.

Ukawa watahadharishwa kutoharibu mjadala wa katiba

Mjumbe wa Halmashauri Kuu ya Taifa ya CCM Mh, Balozi Seif Ali Iddi.

Na Mwantanga Ame, Singida

MJUMBE wa Halmashauri Kuu ya Taifa ya CCM, Mhe. Balozi Seif Ali Iddi, amesema hawatakubali kuona Umoja wa Katiba ya Wananchi (UKAWA), unauchafua awamu ya pili ya mjadala wa kupatikana katiba mpya, kwani kamati 12 za bunge zimemaliza kazi zake vizuri.

Aliysema hayo wakati akiwahutubia wanachama wa CCM katika mkutano wa hadhara uliofanyika kata ya Chiuyu, wilaya ya Manyoni mkoaniSingida.

Balozi Seif, ambae pia ni Makamu wa Pili wa Rais wa Zanzibar, alisema wanalazimika kutoa tahadhari hiyo kwa vile tayari kuna taarifa kwamba umoja huo huenda ukarudi bungeni baada ya kuzungumza na Rais Kikwete.

Alisema nafasi yao ya kurudi isiwe sababu ya kuchafua awamu ya pili ya mjadala huo.
Alisma CCM itaendelea na msimamo wake wa kutetea mfumo wa serikali mbili kwa sababu wananchi wameshaelewa madhara ya mfumo wa serikali tatu.

Alisema inashangaza kuona baadhi ya watu kudai wajumbe wa CCM, hawajadili rasimu ya Jaji Warioba, wakati taratibu zinawaruhusu wajumbe kurekebisha palipokosewa.

Aidha alisema madai kuwa katiba inayotungwa ni ya CCM hayana ukweli kwa sababu wajumbe wengine kutoka kundi la 201 wanashiriki kujadili.

Alisema nia ya serikali ni kuona Tanzania inapata katiba iliyo bora na itakayowaunganisha wananchi.

Sitta amshambulia Kubenea bungeni

Mwenyekiti wa Bunge Maalumu la Katiba, Samuel Sitta.

Dodoma. Mwenyekiti wa Bunge Maalumu la Katiba, Samuel Sitta amemshambulia Mkurugenzi Mtendaji wa HaliHalisi Publishers, Saed Kubenea kwa kitendo chake cha kufungua shauri mahakamani kupinga Bunge hilo.

Sitta alikwenda mbali na kumfananisha Kubebea na mchekeshaji wa mfalme huku akimtuhumu kuwa wapo wafadhili nyuma yake katika hatua yake hiyo.

“Karne za nyuma, karne ya 15, 16 na 17 wafalme kule Ulaya walikuwa na watu wao wanaitwa court jesters (wachekeshaji). Eneo la mfalme lilikuwa kama mahakama halafu kuna mchekeshaji,” alisema.

“Sasa wafalme wa Ulaya walikuwa wanaajiri wachekeshaji kwa malengo mawili. Moja ni kumsifia mfalme kwa kila kitu na jingine ni kuwasema wote wale ambao mfalme anahisi ni wabaya wake.

“Kwa hiyo kuna watu wa aina hiyo, tunawaona hadi sasa kama kina Kubenea, ni mchekeshaji wa mfalme tu. Yeye kuna mfadhili na wafadhili wako nyuma yake.”

Alisema wafadhili hao wanamsogeza kwa sababu wamemwona ana vipaji vya kufanya kazi kama hizo. Tuwaone nao kuwa kuna njia nyingi za kupata riziki tuwasamehe tu waendelee na shughuli zao”.

Akijibu madai hayo, Kubenea alisema: “Nimemsikia Sitta, lakini sijafahamu kama alikuwa anazungumzia kesi niliyofungua mahakamani au kazi zangu za uandishi wa habari, lakini madai kwamba natumika, yeye (Sitta) anajua kwamba sijawahi na sitawahi kutumika. Ninafanya kazi zangu kwa uadilifu na uaminifu mkubwa kwa masilahi ya umma.”

Alisema hata pale gazeti lake lilipokuwa linamwandika Sitta vizuri si kwa sababu alikuwa amewalipa, bali wakati huo alikuwa anasimamia haki na hata sasa anapomwandika upande wake wa pili, ndiyo ukweli wa jinsi alivyo.

Kubenea alisema Sitta anapingwa wakati huu kutokana na kitendo chake cha “kutumia Bunge la Katiba kunyofoa maoni ya wananchi katika kazi takatifu iliyofanywa na Tume ya Jaji Warioba.”

Sitta ajipigia debe urais

Sitta alitumia nafasi hiyo kujibu hoja zinazotolewa dhidi yake kuwa jinsi anavyoendesha Bunge Maalumu, amepungukiwa sifa za kuwania urais mwaka 2015 huku akijipigia debe kiaina katika nafasi kuwania nafasi hiyo.

Muda mfupi kabla ya Kamati 12 za Bunge hazijaanza kuwasilisha taarifa za kuhusu Rasimu ya Katiba, Mwenyekiti huyo aliweka wazi kuwa iwapo Watanzania watahitaji rais makini na mwadilifu mwaka 2015 basi wamfikirie pia yeye.

Alisema watu wanaojaribu kumpima kama anafaa kugombea urais 2015 kwa kuangalia yale yanayotokea katika Bunge Maalumu la Katiba wanampima kwa hoja duni.

“Wengine wananikejeli, wanasema kwa shughuli hii naonyesha sifai urais, mimi sijaomba urais. Naifanya kazi hii kama Mwenyekiti wa Bunge la Katiba,” alisema Sitta na kuongeza: “Haya mengine rafiki yangu Juma Duni Haji (Makamu Mwenyekiti wa CUF) ananipima kwa hoja zilizo duni kabisa. Anajaribu kunipima eti... lakini nasema wanaochagua rais ni wananchi. Inawezekana mwakani wananchi wa Tanzania wakatamani mtu mzima, aliyetulia, asiyewaogopa wapuuzi, wakatamani hilo. Kama watahitaji mtu makini, mwadilifu basi wajue tu kuna sisi wengine tunaweza kufikiriwa kwa mambo kama hayo.”

Kuhusu Tume ya Warioba

Sitta alisema wananchi wengi wameonyesha shauku ya wajumbe kuendelea na vikao vya Bunge Maalumu la Katiba tofauti na inavyotangazwa.

“Makundi mbalimbali ya wananchi walioisoma rasimu yamebaini ina upungufu kama sisi, ndani ya kamati zetu tumeona hivyo na hilo siyo jambo la ajabu na wala si kupuuza kazi ya Tume,” alisema.

Sitta alisema Tume ya Mabadiliko ya Katiba chini ya Mwenyekiti wake, Jaji Joseph Warioba ilifanya kazi yake vizuri lakini kama ilivyo hulka ya mwanadamu hakukosekani upungufu.

“Tukumbuke kuwa Tume ilipokea maoni kutoka kwa wananchi 334,000 na mabaraza zaidi ya 700.

Walichokileta ni tafsiri yao kuhusu maoni hayo, mnielewe vizuri,” alisema Sitta na kuongeza: “Walikaa wakachambua, mengine wakayaacha mengine wakayarekebisha. Ingekuwa kuleta maoni yote ingekuwa likitabu likubwa ambalo tusingeweza kulibeba.”

Sitta aliwasihi wajumbe wanaoendelea na bunge hilo kutofadhaishwa na matusi na kejeli wanazorushiwa huku akisisitiza kuwa yuko imara na hayumbi.

Kauli hiyo ya Sitta imekuja wakati makundi mbalimbali ya jamii wakiwamo wasomi, wanasiasa, viongozi wa dini na wanaharakati wakipaza sauti kutaka Bunge lisitishwe. Msingi wa kutaka kusitishwa kwa Bunge hilo ni kutaka kutafutwa kwanza kwa maridhiano kati ya CCM na wajumbe wa Umoja wa Katiba ya Wananchi (Ukawa) ambao wamesusia Bunge hilo.

Wajumbe wa Ukawa walisusia Bunge hilo tangu Aprili mwaka huu, wakipinga kitendo cha Bunge kuacha kujadili rasimu iliyobeba maoni ya wananchi na kuingiza mambo mapya waliyosema yana nia ya kubeba masilahi ya CCM.

CHANZO: MWANANCHI.

Mjumbe Arfi arudisha hoja za Ukawa bungeni

Mjumbe wa Bunge Maalumu, Said Arfi.

Dodoma. Mjumbe wa Bunge Maalumu, Said Arfi amelitikisa Bunge jana baada ya kuwasilisha hoja sawa na zile zinazosimamiwa na Umoja wa Katiba ya Wananchi (Ukawa).

Arfi ambaye pia ni Mbunge wa Mpanda Kati (Chadema), alilitikisa Bunge hilo, alipowasilisha maoni ya wajumbe wachache wa Kamati Namba 10 inayoongozwa na Anna Abdallah.

Alisema wajumbe wengi wamependekeza marekebisho ya sura ya saba kwa kuweka Makamu wa Rais watatu yaani mgombea mwenza, Rais wa Zanzibar na Waziri Mkuu.

Hata hivyo, alisema wachache wamependekeza sura hiyo kubaki kama ilivyopendekezwa kwenye Rasimu kwa sababu muundo wa serikali tatu uliopendekezwa hauhitaji kuwa na makamu wa rais watatu wala ofisi ya Waziri Mkuu.

Kwa mujibu wa Rasimu hiyo, Ibara ya 70 inasema kutakuwa na Serikali ya Jamhuri ya Muungano itayokuwa na Rais, makamu na mawaziri wa Jamhuri ya Muungano.

Tofauti na walio wengi ambao wamependekeza mawaziri na naibu mawaziri watokane na Bunge, wachache katika kamati hiyo wametaka ibaki kama ilivyo katika Rasimu ya kuwa mawaziri wasitokane na wabunge.

Alisema mapendekezo hayo yataleta ufanisi zaidi katika utendaji wa mawaziri katika wizara husika.
“Sababu nyingine ni kuondoa uwezekano wa waziri ambaye ni mbunge kupendelea jimbo lake la uchaguzi ili aweze kuchaguliwa tena katika chaguzi zinazofuata,” alisema.

Pia alisema wajumbe wengi wameondoa dhana ya Serikali ya Tanganyika na kufuta mapendekezo yanayoweka utaratibu wa viongozi wa serikali hiyo kushiriki katika chombo cha uhusiano na uratibu wa Serikali kinachoanzishwa na Rasimu.

Hata hivyo, alisema wajumbe wachache wamependekeza ibara hizo zibaki kama zilivyopendekezwa katika Rasimu ya Katiba kwa sababu maudhui yaliyowekwa yanakidhi muktadha na majukumu ya chombo husika katika muundo wa serikali tatu.

Arfi alisema wajumbe wengi walipendekeza kuingizwa kwa sura na sehemu mpya zilizopendekezwa kuhusu mamlaka ya umma, ardhi, maliasili na mazingira na sehemu ya Taasisi ya Kuzuia Rushwa katika sura ya 13.

Alifafanua kuwa wajumbe wengi pia walipendekeza sura ya ardhi, maliasili na mazingira.

“Wajumbe wachache hawazikubali sura na ibara mpya zote zilizopendekezwa kwani zinalenga katika kuongeza mambo ya muungano katika Rasimu ya Katiba,” alisema.

Katika kamati hiyo, wajumbe wengi wamependekeza kuwapo na uraia wa nchi zaidi ya moja kwa sababu Watanzania walioko nje ya nchi wangependa kurudi na kuwekeza nyumbani kwao.

Hata hivyo, alisema wajumbe wachache wamependekeza sura hiyo ibaki kama ilivyopendekezwa katika Rasimu ya Katiba kwa sababu kuna hatari nyingi zinazoambatana na uraia pacha ikiwa ni pamoja na kuhatarisha usalama wa nchi.

CHANZO: MWANANCHI.

Sitta azidi kuinanga rasimu ya Jaji Warioba

Mwenyekiti wa Bunge Maalumu la Katiba ambaye pia ni Waziri wa Afrika Mashariki, Samuel Sitta.

MWENYEKITI wa Bunge Maalumu la Katiba, Samuel Sitta, ameendelea kusisitiza kuwa rasimu ya Katiba mpya iliyosimamiwa na Jaji Joseph Warioba imejaa kasoro.

Kutokana na hali hiyo, amesema Bunge Maalumu la Katiba limelazimika kuiboresha kwa kuwa kila kitu kinachoandikwa na binadamu hakiwezi kuwa sahihi.

Sitta alitoa kauli hiyo mjini hapa jana, alipokuwa akipokea ujumbe wa viongozi wa vyama na asasi za watu wenye walemavu kutoka Tanzania Bara na Zanzibar.

“Kuna mambo yanaendelea hapa, wengine wanayakejeli, ingawa ni ya kawaida kuelekea kupata Katiba mpya.

“Jambo lolote lililoandikwa na binadamu haliwezi kuwa sahihi, hii rasimu siyo msahafu kiasi kwamba haiwezi kubadilishwa, hiyo siyo sahihi kabisa.

“Hao wanaosema tunafanya mambo ya tume, waendelee kusema tu, lakini Bunge Maalumu la Katiba lina mamlaka ya kurekebisha upungufu hata msemeje, rasimu hii tumegundua ina upungufu kadha wa kadha, lazima tuiboreshe.

“Bahati nzuri hata waandishi wengine mko hapa, yaani hata nyinyi mmeamua kujiingiza katika jambo hili hadi mnaandika ‘ma-editorial’.

“Kuna vita kubwa na nzito, kuna watu wanapiga vita taasisi hii, mimi siwajali, yaani sijawahi kuona watu wakikosa uzalendo kiasi hiki, lakini sisi tutaendelea hata mkifanyaje,” alisisitiza Sitta.

Pamoja na hayo, Sitta alizungumzia mwenendo wa Bunge Maalumu la Katiba na kusema linaendeshwa vizuri na kwamba Katiba mpya itakayopatikana itakuwa nzuri na wananchi wataifurahia.

“Kwa maana hiyo, ndugu zangu walemavu msiwe na wasiwasi, haya mnayoyasema hapa nitahakikisha yanaingizwa kwenye majumuisho, kwani hata leo mchana (jana) nitakutana na Kamati ya Uongozi ambayo nitaieleza juu ya haya mapendekezo yenu,” alisema.

Awali Mkurugenzi Mtendaji wa Kituo cha Ushauri cha Watu Wenye Ulemavu, Kaganzi Rutachwamagyo, aliwasilisha ripoti ya mapendekezo wanayotaka yawemo katika Rasimu ya Katiba mpya.

Katika mapendekezo hayo aliyosema yamesainiwa na Katibu Mkuu wa Shirikisho la Watu Wenye Ulemavu Tanzania (Shivyawata), Felician Mkude, Rutachwamagyo alisema yamefanyika kwa sababu rasimu ya Katiba imezungumzia walemavu bila kuwaangalia kwa undani.

“Kuna msemo katika Biblia sijui uko sura gani na katika kitabu kipi, lakini unaeleza kwamba Yesu anasema hakuja kutengua Torati bali kuitimiliza.

“Kwa mfano, kifungu cha 113 cha Rasimu ya Katiba kinasema Rais atachagua watu wenye ulemavu watano kuwa wabunge katika Bunge la Jamhuri ya Muungano wa Tanzania, lakini sisi tunaona hii siyo sawa kwetu,” alisema.

Mjadala wa jumla ndani ya Bunge Maalumu la Katiba unaanza leo kwa Kamati 12 za Bunge hilo kuwasilisha taarifa zao.

Mjadala huo unaanza wakati baadhi ya wajumbe wa Bunge hilo wanaounda kundi la Ukawa wakiwa bado wamegoma kurudi, huku hofu kubwa ikitawala kama wajumbe waliobaki wataweza kupitisha Ibara za rasimu hiyo kwa kupata idadi ya theluthi mbili kwa kila upande wa Muungano kwa mujibu wa Sheria ya Mabadiliko ya Katiba ya mwaka 2013.