Friday, 8 April 2016

Wenje apigwa mweleka Nyamagana

Stanslaus Mabula, Mbunge wa Nyamagana akitoka kwa shangwe Mahakama ya Sumbawanga, baada ya kutangazwa ushindi.
EZEKIEL Wenje, mbunge wa zamani wa Jimbo la Nyamagana, Mwanza ameshindwa kwenye kesi aliyoifungua katika Mahakama Kuu Kanda ya Sumbawanga dhidi ya Stanslaus Mabula.

Mahakama hiyo leo imempa ushindi Mabula (CCM) baada ya kujiridhisha kuwa, upande wa madai hauna ushahidi unaokidhi, kuithibitishia mahakama.

Wenje alifungua kesi hiyo akipinga matokeo ya uchaguzi wa jimbo hilo mwaka jana yaliyotangazwa na Tume ya Taifa ya Uchaguzi (NEC) na kumpa ushindi Mabula.

Katika kesi hiyo namba tatu ya mwaka 2015, ambayo ilionekana kugusa hisia za wakazi wa Nyamagana imehudhuriwa na idadi kubwa ya wafuasi wa upinzani.

Akitupilia mbali shauri hilo leo Kakusulo Sambo, Jaji wa Mahakama Kuu, Kanda ya Sumbawanga amesema kuwa, amefikia hatua hiyo baada ya upande wa mpeleka maombi kuiomba mahakama kuifungwa kesi hiyo.

Amesema upande wa mpeleka maombi, ulidai kwamba kutokana na ombi lao la kupokelewa kwa fomu namba 21B kukataliwa kortini hapo, ulidai hakuna umuhimu wa kuendelea kwa kesi hiyo.

Jaji Sambo amesema, upande wa mpeleka maombi, licha ya kupewa muda wa siku 10 kupeleka fomu namba 21B lakini hawakufanya hivyo.

Amesema, pamoja na kuchelewa kupeleka fomu hiyo pia walipopewa muda wa kujieleza katika ombi lao la kuiomba mahakama kupokea fomu hizo, hawakueleza sababu za msingi.

Hata hivyo amesema baada ya kuwasilishwa kwa ombi hilo kortini, mahakama ilikaa na kutafakari kwa kina juu ya ombi hilo ambapo imeamua kutupilia mbali kesi hiyo.

“Mleta maombi aliomba kufunga kesi mahakamani na mahakama sasa imepitia ombi lao, hivyo na kuona kesi hii haina msingi wowote ule na tunakubaliana nao,” amesema Jaji Sambo.

Hata hivyo wakati shauri hilo likitupiliwa mbali kortini hapo, Wenje pamoja na wakili wake, Deya Outa hakuwepo mahakamani hapo bila taarifa yoyote.
CHANZO: MWANAHALISI ONLINE

Maalim Seif turufu


Katibu Mkuu wa CUF Maalim Seif Sharif Hamad.

ALIYEKUWA mgombea urais wa Chama cha Wananchi (CUF), Seif Shariff Hamad, ndiye ambaye ataamua mwelekeo wa siasa za Zanzibar katika kipindi cha muda mfupi na wa kati ingawa matatizo ya visiwa hivyo yanatakiwa kwenda mbali zaidi ya mtu mmoja, Raia Mwema limebaini.

Uchunguzi uliofanywa na gazeti hili katika kipindi cha kuelekea Uchaguzi Mkuu wa Marudio, wakati wa uchaguzi wenyewe na baada ya uchaguzi huo uliofanyika Machi 20 mwaka huu, umebaini kwamba katika wakati huu, hakuna suluhisho linaloweza kupatikana pasipo Hamad, ambaye pia ni Katibu Mkuu wa CUF, kuhusishwa kwa namna yoyote.

Tayari CUF kimetangaza kutomtambua Rais wa Zanzibar, Dk. Ali Mohamed Shein, katika taarifa ambayo ni wazi imeanza kuwakumbusha Wazanzibari katika nyakati za giza baada ya Uchaguzi Mkuu wa mwaka 2000 uliomwingiza madarakani Rais Amani Karume.

Hamad ambaye ni maarufu kwa jina la Maalim Seif mwenye uzoefu wa zaidi ya miaka 40 katika siasa za Tanzania ndiye mwanasiasa pekee visiwani Zanzibar anayekubalika katika pande zote mbili za visiwa hivyo; Unguja na Pemba na ushawishi umeonekana katika chaguzi zote za vyama vingi zilizofanyika Zanzibar tangu mwaka 1995.

“ Zanzibar kuna matatizo ya kisiasa lakini hayawezi kumalizwa bila ya kumshirikisha Maalim Seif. Mtu yeyote anayedhani kwamba anaweza kuleta mwafaka Zanzibar kwa kumtenga Maalim atakuwa anajidanganya tu. 

Yeye ndiye pekee ambaye anayekubalika Pemba na Unguja, alisema mzee Salim Rashid, Katibu Mkuu wa kwanza wa Baraza la Mapinduzi la Zanzibar katika mazungumzo yale aliyoyafanya na Raia Mwema mwezi uliopita nyumbani kwake Unguja.

Takwimu za chaguzi mbalimbali zilizokusanywa na Raia Mwema zinaonyesha kwamba tangu mwaka 1995, CCM imekuwa ikipunguza idadi ya viti vyake na kura katika ngome yake ya Unguja wakati CUF imekuwa ikijiimarisha zaidi visiwani Pemba. Katika Uchaguzi Mkuu wa mwaka 1995, Maalim alipata kura 163,706 na kura hizo ziliongezeka mwaka 2005 wakati alipopata kura 207,733.

Ingawa taarifa rasmi za matokeo ya uchaguzi uliofutwa wa Oktoba 25, 2015 hazijawekwa hadharani, CUF kinaamini kwamba kilipata viti vyote vya Baraza la Wawakilishi Pemba na walau viti vinane kisiwani Unguja ambako kwa muda mrefu ni ngome ya CCM.

Kihistoria, Pemba imekuwa ngome ya upinzani tangu wakati wa utawala wa Sultan na kilipokea vema vyama vya Zanzibar Nationalist (ZNP) na Zanzibar and Pemba Peoples (ZPPP). CCM ni zao la chama cha Afro Shiraz kilichoanzishwa Unguja ambako ndiko iliko ngome ya CCM.

Katika kitabu kinachoeleza maisha ya Maalim Seif na Ali Sultan Issa kiitwacho “Race, Revolution and the fights for Human Rights in Zanzibar”, Wapemba walipokea vema upinzani wakati huo kwa sababu ingawa Pemba ndiyo ilikuwa mzalishaji mkubwa wa zao kuu la kibiashara la Zanzibar, faida walikuwa wanapata watu wa Unguja.

Maridhiano
Jambo linalotakiwa Zanzibar katika kipindi kirefu ni maridhiano ya watu badala ya wanasiasa kutokana na historia ya miaka 50 iliyopita ya visiwa hivyo. Kwenye miaka ya kwanza iliyofuata mapinduzi ya Zanzibar, kuna familia ziliuliwa kikatili, watu kufilisiwa mali zao na mambo yasiyo ya kibinadamu yaliyowafanya watu wawe na kinyongo.

Baadhi ya wanasiasa na wasomi wa Zanzibar wanapendekeza kwamba Wazanzibari wanatakiwa wapate jukwaa la kuzungumza mambo yao na kusameheana kwa yaliyotokea baada ya Mapinduzi ya mwaka 1964 ili kujenga jamii isiyo na kinyongo.
CHANZO: RAIA MWEMA.

Aliyoniambia Mwalimu kuhusu Maalim


Maalim Seif Sahrif Hamad (wa nne kulia) akiwa katika moja ya vikao pamoja na Mwalimu Nyerere mwaka 1984.

Na Ahmed Rajab.

KAMA ilivyo kwa Julius Kambarage Nyerere ndivyo ilivyo kwa Seif Sharif Hamad. Wote ni maarufu kimataifa kwa jina moja tu. Mmoja Mwalimu, mwengine Maalim.Majina mawili yenye maana moja. Majina hayo hutamkwa tofauti kutegemea mtu yuko wapi na amekulia katika mazingira gani.

Wote wawili, Mwalimu na Maalim,walikuwa na kazi ya ualimu kabla hawajawa wanasiasa waliobobea.

Nilianza kumjuwa Maalim kabla hajawa mwalimu tulipokuwa wanafunzi katika skuli ya King George VI Memorial Grammar Secondary School, (siku hizi Skuli ya Sekondari ya Lumumba) iliyoko Saateni, Unguja.Alikuwa mbele yangu kwa miaka miwili.

Hakuwa mzungumzaji sana. Kwa hakika, hakuwa akichanganyika sana na wanafunzi wengine. Miaka hiyo nikimuona tu skuli, akiwa mmoja wa wanafunzi kutoka Pemba waliokuwa wakiishi katika bweni ya Beit el Ras, nje kidogo ya mji.Wakiletwa skuli kila asubuhi na kurejeshwa mchana kwa magari ya bweni.

Seif wa siku hizo alikuwa mrefu, mwembamba, aliyepinda kidogo na aliyekuwa akivaa sare ya skuli, shati jeupe na suruali ya khaki.

Mara nyingine akija skuli akiwa amepiga kanzu na kofia. Mwalimu Mkuu wa skuli,G.G.Davies, akiruhusu kanzu na kofia kuwa ni sare mbadala.

Nadhani sikio moja la Seif likimpa taabu kwani alikuwa heshi kutia pamba sikioni. Jengine ninalolikumbuka ni kwamba alikuwa akitafakari sana.

Daima uso wake ulikuwa chini akiwa mwenye mawazo. Akifikiri nini? Sijui. Na alikuwa na macho, ambayo Waingereza wangeliyaita “meditative eyes”, yaani macho ya tafakuri au ya mazingatio.

Waliosoma naye darasa moja wanasema Seif hakuwa mtu wa maneno mengi, wa mizaha isiyo na maana. Alikuwa mtulivu, mpole na mkimya. Wanasema ilikuwa taabu kuzijuwa fikira zake kwa vile alikuwa si mbobokaji.

Akipendelea kuchunguza mambo tu na kuwasikiliza wengine kwa makini. Hata katika mijadala ya skuli alikuwa si mtetezi ingawa alikuwa hakosi kuhudhuria mijadala hiyo.

Seif alionyesha mapema dalili za uongozi. Alipokuwa darasa la kumi alikuwa kepteni wa bweni lao akiwasimamia hata wakubwa zake kwa umri.

Kwenye bweni lao akijulikana kwa kupenda kusoma. Baada ya saa nne za usiku jenereta lilipokuwa linazimwa, Seif alikuwa akiwasha taa ya kandili au karabai na akiendelea kusoma. Nadhani hiyo ndiyo sababu iliyomfanya baadhi ya wakati aonekane kama mtu aliyekosa usingizi.

Alipoingia Kidato cha Tano alikuwa ama kiranja au naibu wa kiranja wa skuli.
Tangu enzi hizo vijana wa Kipemba walikuwa wakinung’unika kwa namna kisiwa chao kilivyokuwa kikionewa na watawala licha ya kwamba Zanzibari kipata sehemu kubwa ya mapato yake kutoka mauzo ya karafuu za Pemba na, kwa hivyo, kisiwa cha Unguja kikinufaika zaidi.

Kulikuwa na jengine lililokuwa likiwaudhi: sisi wa Unguja tukipenda kuwafanyia stihizai.
Tukiwatumbukiza katika kapu moja na tukiwafanyia tashititi na kuwacheka, kwa mfano, kwa lafudhi zao au kwamba eti wakipenda sana vitu vitamu kiasi cha kuwafanya wawe wanakula haluwa kwa chai ya maziwa.

Nadhani idhilali hizo ndizo zilizozidi kuwafanya wawe kitu kimoja na zilizowafanya waamue kuwa na chama chao cha wanafunzi wazawa wa Pemba.

Badala ya kujiunga na All Zanzibar Students’ Union (AZSU), chama cha wanafunzi wa Zanzibar nzima, wao waliunda chama walichokiita rasmi Pemba Students’ Union(PSU, Chama cha Wanafunzi wa Pemba). Wengine wakikiita Pemba-Born Students’ Union, yaani Chama cha Wanafunzi Waliozaliwa Pemba.

Chama cha PSU kilikuwa na kamati ya watu watano na Seif ndiye aliyekuwa kiongozi wao.
Wanafunzi hao wa Kipemba wakishikamana bila ya kujali vyama vyao vya siasa.Seif alikuwa mfuasi waAfro-Shirazi Party (ASP).Mwanafunzi mwengine wa Kipemba, Enosh Timothy Bilal, niliyekuwa nikikaa naye deski moja skuli na aliyekuwa akiishi Beit el Ras,naye pia alikuwa mfuasi mkubwa wa ASP.

Nakumbuka kuna wakati vijana hawa kutoka Pemba walianzisha vuguvugu lao lisilo rasmi waliloliita “Pemba Yekka”. Waliliigiza jina la chama cha Kabaka Yekka cha Uganda, chama ambacho kilikuwa kikimuunga mkono Kabaka Mutesa, mfalme wa Wabaganda.

Kwa lugha ya Kiganda “yekka” maana yake ni “tu”, kwa hivyo “Kabaka Yekka” ilikuwa na maana ya “Kabaka Tu”.

Wabaganda wakiyatumia matamshi hayo kusalimiana. Mmoja akisema “Kabaka”, mwengine akiitika “Yekka” na halafu kila mmojawao akionyesha juu kidole chake cha shahada.

Wafuasi waPemba Yekka hawakuwa wakisalimiana kwa kaulimbiu hiyo iliyokuwa na maana ya “Pemba Tu”.

Nilipoondoka Zanzibar 1964 kwenda Uingereza kwa masomo, Seif alikuwa ameshahitimu Kidato cha Sita na alilazimishwa kusomesha skuli za sekondari. Kwanza aliajiriwa Lumumba alikosomesha Kiingereza, Fasihi na Historia.

Nasikia Maalim Seif alikuwa mwalimu mzuri. Aliendelea kusomesha hadi 1972, pale serikali ya Rais Aboud Jumbe ilipompatia nafasi ya kuingia Chuo Kikuu cha Dar es Salaam alikohitimu na kutunukiwa shahada ya B.A.(Hons) miaka mitatu baadaye.

Tangu 1964 sikumshuhudia tena Seif hadi mwezi wa mfungo wa Ramadhani katika miaka ya kati ya 1970 nilipokutana naye Mombasa. Ilisadifu kwamba akija kufuturu Mji wa Kale katika nyumba niliyoshukia ya Maalim Saleh Abdallah Jahadhmy “mwandani”, mwalimu wetu wa zamani aliyekuwa na asili ya Lamu.

Tulikuwa tukifuturu watu wanne; mwengine akiwa kijana wa Kikenya. Wakati wa futari, Maalim Jahadhmy alikuwa akiulizauliza habari za siasa. Wakati wote,kama kawaida yake, Seif alikuwa akisikiliza tu. Hakujifanya mjuaji ingawa nina hakika akiyajuwa mengi.Mimi ndiye niliyejidai kujuwa na nikimjibu Jahadhmy.

Maalim aliweza kuchupa na kutua kwenye medani ya siasa za kitaifa alipoteuliwa na Jumbe awe waziri wa elimu wa Zanzibar 1977.

Jumbe, mwalimu wetu wa zamani katika skuli ya King George, akimpenda Maalim na alimsaidia kwa kumpa fursa ya kusoma masomo ya juu na kwa kumuingiza katika siasa za kitaifa. Unaweza kusema kwamba ndiye aliyemjenga.

Mwalimu Nyerere, ambaye mwanzoni akimpenda Maalim, akijigamba kwamba ni yeye aliyemjenga.

Niliwahi kuandika katika ukurasa huu nilipomkuta Mwalimu akibugia njugu na bia chumbani kwake katika hoteli ya Intercontinental jijini Nairobi kabla ya Chama cha Mapinduzi (CCM) kumpata mgombea wake wa urais katika uchaguzi wa 1995. Mwalimu aliniuliza watu wakisemaje kuhusu mchuano huo.

Nikamjibu: “Wanasema una mtu wako.”
“Nani?”
“Salim (Salim Ahmed Salim)”
“Kwa nini?”
“Kwa sababu mtoto wako.”

Kumwambia hivyo aliruka na akanambia kwa mkazo: “Lakini wote watoto wangu. Kwani hata Seif, nani unadhani kamjenga?”

Nikamwambia: “Wewe” kwa sababu nikijuwa kwamba ndivyo alivyotaka nimwambie.
“Tena!” Mwalimu alisema kwa hamasa na kana kwamba akijipongeza akiwa anapiga soga barazani na vijana wa mjini.

Ilikuwa wazi alipoyasema hayo kwamba aliona fahari kubwa kujihusisha na Maalim kwani aliutambua uwezo wake, kipaji chake na utendajikazi wake.

Ndio maana alimkabidhi nyadhifa kubwa kubwa ndani ya CCM. Hata wakati wa sokomoko la kisiasa Zanzibar katika enzi ya Rais mstaafu Salmin Amour, Nyerere aliwahi kutamka kwamba ufumbuzi wa mgogoro wa Zanzibar lazima umhusishe Maalim.

Na kuna ule mkutano wa siri Butiama ambao mpaka leo hatujui kilipita nini baina ya Maalim na Mwalimu.
Tunachokijuwa ni kwamba Maalim hakuzuzuka kwa kupendwa na Mwalimu. Alithubutu kusimama imara akitetea msimamo wake kuhusu Zanzibar, hatua ambayo ilisababisha akamatwe na kuwekwa ndani gerezani.

Katika ushirikiano wa Maalim na Mwalimu kuna kadhia moja iliyomtia doa Maalim, doa litalomganda maisha. Hii ni kadhia ya jinsi Mwalimu na CCM walivyompindua Jumbe.

Kuna wanaomtuhumu Maalim kwamba alimwendea kinyume Jumbe na kumfanyia hiyana. Juu ya hayo, tusisahau tu kwamba historia ina mifano mingi ya watu waliowahini wenzao kwa malengo adhimu.

Maalim amejaribu sana kujitetea lakini utetezi wake bado haukuwaridhisha wanaomtuhumu.
Kwa upande mwingine, msimamo wa Maalim kuhusu suala la usawa wa Tanganyika na Zanzibar ulimfanya awe mwiba uliokuwa ukimchoma Mwalimu. Aliushikilia msimamo huo hata alipokuwa waziri kiongozi wa Zanzibar (1984-1988). Mwishowe Mwalimu alibidi ampikie jungu la kumfukuzisha kutoka CCM.

Moja ya sababu zilizomfukuzisha Maalim kutoka CCM ni idadi ndogo sana ya kura alizopata Rais Idrissa Abdul Wakil huko Pemba katika uchaguzi wa chama kimoja uliofanywa 1985.
Lawama ilimwangukia Maalim kuwa eti alimtilia fitna Abdul Wakil Pemba na ndio maana huko aliondokea patupu.

Baada ya kufukuzwa CCM na kabla ya vyama vya siasa kuhalalishwa nchini 1992, Maalim Seif alikuwa akiliongoza vuguvugu la KAMAHURU pamoja na akina Shaaban Mloo, Maulidi Makame, Ali Haji Pandu na Hamad Rashid.

Kilikuwa kipindi kigumu kwake. Wakati huo katika miaka ya 1980 tayari kulikuwako na vuguvugu la Wazanzibari nje ya nchi lililoasisiwakwenye mkutano uliofanywa mjini Malmo, Sweden, chini ya uenyekiti wa Abdulrahman Babu, aliyekuwa kiongozi wa chama cha zamani cha Umma Party.

Vuguvugu hilo likiitwa Harakati za Kuleta Mabadiliko ya Kidemokrasia (kwa ufupi HAMAKI na kwa Kiingereza likiitwa Zanzibar Democratic Alternative).

Waliokuwa kwenye vuguvugu hilo walikuwa Wazanzibari wa itikadi tofauti za kisiasa.Miongoni mwao alikuwa Dk. Yusuf Saleh Salim aliyekuwa na mahusiano mazuri na viongozi wa KAMAHURU.

Alipokuwa akiongoza KAMAHURU ndipo ukomavu wa kisiasa wa Maalim ulipoanza kudhihirika na dunia ilipoanza kutambua kwamba Zanzibar ina kiongozi wa kipaji cha juu.

Naweza kusema kwamba miongoni mwa magwiji wa kisiasa waliovutiwa naye alikuwa Babu.
Watu wawili hao walikuwa na itikadi tofauti lakini kwa maslahi ya Zanzibar fikira zao zilioana.

Ninayajuwa hayo kwa sababu mimi ndiye niliyewakutanisha ana kwa ana kwa mara ya kwanza.
Ilikuwa 1988 nilipowaalika kwa chakula cha usiku nyumbani kwangu, siku hizo nikiwa katika mtaa wa Stoke Newington, London.

Babu baadaye alijiunga na NCCR-Mageuzi lakini akitambua kwamba kiongozi atayeweza kuleta mageuzi ya kimaendeleo Zanzibar ni Maalim. Alikuwa na sababu zilizomfanya ajiunge na NCCR-Mageuzi lakini hazikuwa za kutokuwa na imani na Maalim.

Maalim Seif hajakamilika na wala hawezi kukamilika kwani ni mwanadamu.Hata hivyo,ninaamini ukiwachukuwa wanasiasa wote wa Zanzibar ya leo ukawaweka kwenye mezani uwapime kwa vigezo vyote vya umahiri wa kisiasa, Maalimatawapiku wenzake.

Yeye pamoja na Rais Mstaafu Dk. Amani Karume ni viongozi wenye sifa tofauti, kwa mfano, na zile walizokuwa nazoakina Sheikh Ali Muhsin Barwani (aliyekuwa kiongozi wa Zanzibar Nationalist Party au Hizbu) na Sheikh Abeid Amani Karume (aliyekuwa kiongozi wa ASP). Hao walikuwa viongozi wa kihistoria.

Watu wengi husahau kwamba kwa upande wa Sheikh Ali jambo la mwanzo alilolifanya baada ya kuingia siasa ni kujiuzulu kutoka Jumuiya ya Waarabu akiuweka mbele Uzanzibari wake.
Sheikh Karume, kwa upande wake, akionekana na wengi wa Wazanzibari waliokuwa wakijifaharisha na “Uafrika” kuwa ni mkombozi wao.

Babu, niliyekuwa mimi nikimfuata, kidogo ananipa taabu. Ninaweza nikamuweka katika shubaka la viongozi wa kihistoria lakini nadhani nitakuwa sahihi zaidi nikimpachikakwenye shubaka la peke yakeakiwa mkunga wa historia.

Hawa viongozi wa leo, Maalim Seif na Dk. Karume, wamethibitisha kwamba wao ni viongozi wenye ujasiri na bisara (vision) kubwa. Tunaweza kuyamithilisha Maridhiano yao ya 2010 kuwa, kwa kiwango fulani, kama yale ya Afrika ya Kusini.

Amani Karume alikuwa kamaFW de Klerk kwa kuwa na ujasiri wa kuwashawishi wenzake wafuate mkondo wa kihistoria baada ya kutanabahi kwamba Zanzibar imekuwa ikielekea pabaya na watu wake wamechoka na uhasama.

Maalim, kiongozi aliyekuwa upande wa haki na aliyedhulumiwa, amekuwa kama Nelson Mandela.Kwa bahati mbaya, Maalim hadi leobado anadhulumiwa. Ni dalili ya ujasiri wake kuwa ameweza kuwafanya wafuasi wake wawe watulivu na wayakubali Maridhiano.

Wa mwanzo kumbandika Maalim sifa ya “Umandela” walikuwa wafungwa aliowakuta gerezani Unguja alipokuwa katiwa ndani kuanzia Mei 11, 1989.Julai na Septemba 6 ya mwaka huo aliniandikia barua mbili akiwa jela akinieleza maisha yake yalivyokuwa huko kifungoni.

Miezi sita baadaye aliniletea waraka alioandika wenye kurasa 32 akizichambua siasa za kimataifa, za barani Afrika na za Tanzania. 
CHANZO: RAIA MWEMA.

Wednesday, 6 April 2016

Rais wa Zanzibar na Mwenyekiti wa Baraza la Mapinduzi Dkt. Ali Mohammed Shein.
Na Mohammed Ghassani.

Takribani wiki tatu zilizopita, nilimtabiria Dk. Ali Mohamed Shein kuwa ataiishi miaka yake hii mitano kwenye Ikulu ya Mnazi Mmoja kwa mateso makubwa nafsini mwake. Nilitumia taswira ya mtu ajitazamaye kiooni na kuuona uhalisia kuhusu yeye, huku mwenyewe akitaka kuwaaminisha wengine kuwa yu mtu tafauti.

Hata mwezi mmoja bado haujatimia, tayari kioo kimeanza kumuambia ukweli huo Dk. Shein. Naye, kama utabiri unavyosema, ameanza kugombana nacho kwa kuja nje akipiga makelele huku nje. “Mimi si Ali tu. Mimi ni Rais wa Serikali ya Mapinduzi ya Zanzibar na Mwenyekiti wa Baraza la Mapinduzi. Nimechaguliwa na umma miye. Kwa kishindo!”

Ndiyo muakisiko wa hotuba yake ya juzi kwenye jengo la Baraza la Wawakilishi mjini Unguja, ambapo miongoni mwa mengi yanayoashiria mwangwi wa ugomvi wake huo na kioo, ni pale anapotamka kuwa wananchi wa Zanzibar wameamua kuukataa muundo wa Serikali ya Umoja wa Kitaifa (SUK) kwa kukipa ushindi wa kishindo Chama chake cha Mapinduzi (CCM) tarehe 20 Machi 2016.

Sitaki nikumbushie kile kilichosemwa na msaidizi wake mkuu, Balozi Seif Ali Iddi, wiki moja tu kabla ya hapo, kuwa “serikali ya umoja wa kitaifa itaendelea kuwapo”, lakini nakumbusha kuwa matokeo anayoyataja Dk. Shein kuwa yaliukataa muundo wa SUK ni yale yale ambayo hapa tuliyaita “Miujiza ya Jecha iliyomgeuza chura kuwa Mwana Mfalme”.

Kwa kila hali, hayo hayakuwa matokeo yaliyowasilisha wala kuwakilisha sauti ya Wazanzibari. Vyombo vya habari vya ndani na nje vilivyopata nafasi ya kuyaripoti matukio ya Machi 20 vilionesha vituo vingi vya kura kote Unguja na Pemba, vikiwa vitupu.

Mitandao ya kijamii pia ilijaa picha za wapiga kura wakionesha kile hasa walichokuwa wakikifanya kwenye vyumba vya kura. Kuna waliopewa karatasi zaidi ya moja za kura – kama mke wa ndugu yangu ambaye pia ni mwalimu wa skuli moja ya wilaya ya Magharibi, lakini wakaishia kuziandika “Allah Akbar” – Mungu Mkubwa.

Huyu alirudi nyumbani akilia akimuambia mumewe kuwa anajihisi ameisaliti Zanzibar kwa kuamua kwenda kupiga kura kwa kuwa tu analinda kibarua chake.

Kuna waliotuma vidio zinazoonesha wakimpelekea ujumbe Jecha Salim Jecha, Mwenyekiti wa Tume ya Uchaguzi (ZEC), kwa kumuandikia: “Jecha, tambua kuwa dhuluma haidumu!” Na hao si kidogo.

Alimradi, kwa mara ya kwanza kwenye siasa za Zanzibar, teknolojia ya mawasiliano ya kisasa ikatumika kuiumbua ZEC, Jecha na CCM kwa pamoja. Uchaguzi walioutisha kwa mbwembwe na hamasa za kuwakomoa wapinzani wao, Chama cha Wananchi (CUF), ukamalizika kwa hizaya kubwa.

Kuna ambao wanahoji kwamba lau CCM ilijuwa haya yangelitokea, basi wasingeliruhusu matangazo ya moja kwa moja ya televisheni na redio kutoka vituo vya kura wala wapigakura kuingia na simu za mkononi. Lakini sikio la kufa huwa halisikii dawa!

Mtumiaji mmoja wa mtandao, ambaye kwa hakika ni mwana-CCM aliyekwenda kupiga kura kwa hiyari yake, aliniandikia hivi: “Nimeondoka nyumbani kwangu Mwembenjugu saa 8:00 mchana kwenda kupiga kura kituo cha Kidongo Chekundu na saa 8:30 nikawa nisharejea nyumbani.

Hii unajuwa maana yake ni nini, Mohammed?” Nikamjibu sijui. Akaniambia: “Inamaanisha kuwa hata sisi wana-CCM tumegomea uchaguzi huu. Hapa Mwembenjugu, Sogea, Kwahani, Kidongo Chekundu pote hapa ni CCM watupu. Lakini vituo vilikuwa vitupu.”

Ndiyo maana wengine tukasema matokeo yaliyotangazwa na Jecha na kumpa Dk. Shein kura 299,982 sawa na asilimia 91.4 ya kura zinazoitwa halali, ulikuwa mchezo wa mazingaombwe. Inavyoonekana Dk. Shein mwenyewe anaujuwa ukweli wa nini hasa kilifanywa na Jecha kupatikana kwa nambari hiyo.

Kwa hivyo, Dk. Shein anafahamu fika kuwa Wazanzibari hawajaukataa muundo wa Serikali ya Umoja wa Kitaifa kama ambavyo anapiga kelele dhidi ya kioo chake huku nje, bali waliyemkataa ni yeye kuwa kiongozi mkuu wa serikali hiyo. Anajuwa kuwa walifanya hivyo kwa mara ya kwanza tarehe 25 Oktoba 2015, pale walipoamua kumuambia kwa heshima na taadhima kwamba: “Ahsante kwa kutusimamia kwa miaka mitano, lakini ulionesha kiwango kidogo cha uongozi wa Zanzibar yetu. Kwa hivyo, kaa chonjo. Tunamuweka mwenzako!”

Kwa kuwa Dk. Shein na CCM yake hawautambui msamiati wa kukataliwa na umma kwa njia za amani, kama ambavyo wamekuwa wakisema mara kadhaa huko nyuma, wakaamua kutokukubali kukataliwa huko na wakayapindua maamuzi halali ya umma. Vyombo vya dola, ambavyo viko chini ya Jamhuri ya Muungano wa Tanzania, vikaingia njiani kula njama ya kuyahujumu maamuzi yenyewe, na kwa baraka na muongozo wa uongozi wa juu, wakaitisha kile walichokiita “uchaguzi wa marudio wa Machi 20”.

Ni kwenye tukio hili la Machi 20 ambapo Wazanzibari walipata nafasi ya mara ya pili kumkataa Dk. Shein, na mara hii wakamuambia pasina tone la heshima wala haya: “Hatukutaki Dk. Shein kuwa kiongozi wetu!”

Wazanzibari walimkataa makamu mwenyekiti huyu wa CCM kuwa rais wa Serikali ya Umoja wa Kitaifa na wala sio kwamba waliukataa muundo huo. Na kwa kuwa Dk. Shein na CCM wanaujuwa ukweli huo, ndio maana bado ile kampeni yao ya pigapiga, vunjavunja na kamatakamata inaendelea kwenye maeneo kadhaa Unguja na Pemba.

Laiti ingelikuwa Dk. Shein anajiamini kuwa Wazanzibari wamempa ushindi anaosema wamempa, basi angelikuwa na uthubutu wa kuwakabili uso kwa macho popote pale na wakati wowote ule.

Angelikuwa shafii na swafii kwao. Lakini kwa kuwa anafahamu ndani ya nafsi yake kwamba walikamtaa, ndio maana anapambana nao kwa kila hali, huku akiapa na kujiapiza kuwa atailinda Katiba dhidi ya yeyote anayeichezea. Kijembe kilioje!

Ni kijembe kwake kusema kuwa Wazanzibari wameukataa mfumo huo, ilhali hata hiyo Katiba anayoapa kuilinda inautambua muundo huo tu wa serikali ya Zanzibar. Ukweli kuwa amemteua Balozi Seif Ali Iddi kuwa makamu wa pili, unatumia mantiki kuwa kulitakiwa awepo makamu wa kwanza, maana huwezi kuwa na wa pili bila ya kuwa na wa kwanza.

Lakini umma umemkataa Dk. Shein, tena kwa katao baya kabisa.
Nakumbuka siku ile ya tarehe 25 Oktoba 2015 pale Bungi Miembe Mingi, wilaya ya Kusini Unguja, mara baada ya kupiga kura yake, waandishi wa habari walimuuliza Dk. Shein kwa nini alikuwa anaamini Wazanzibari wangelikuwa na sababu za kumchagua tena kuwa rais wao, naye akataja sababu kadhaa, lakini kubwa yote akasema ni mafanikio yake kwenye kuiongoza Serikali ya Umoja wa Kitaifa.

Akajisifia kuwa hata mataifa ya nje yanakuja Zanzibar kujifunza namna Wazanzibari walivyoweza kuijenga na kuiendesha serikali hiyo. Akamalizia kuwa chochote kizuri ambacho alikuwa amekifanya kwenye miaka ile mitano ya awali ya uongozi wake, kilitokana na mashirikiano ya pande zote mbili, CUF na CCM, na hivyo hivyo kama ni kukosea, basi wamekosea kwa pamoja. Leo hii ni ajabu kwamba kiongozi ambaye hadi miezi mitano nyuma alijisifia mitano nyuma alijisifia na kujipa heshima kwa SUK, anauvunja muundo huo wa serikali kwa kuwa tu aendelee kuwatawala wananchi asiokuwa na ridhaa yao!

Narudia kwa kumalizia. Ukweli ni kuwa Dk. Shein anafahamu fika kuwa Wazanzibari hawajaamua kuyakataa Maridhiano yao. Hawajaamua kuivunja Katiba yao. Hawajaamua kuirejesha nchi yao kwenye zama za ujahili. Walichokuwa wamekiamua ni kumkataa yeye kama kiongozi wao. Na hilo ndilo linaloendelea kuyafanya maisha yake ndani ya kipindi hiki cha miaka mitano kuwa jehanamu ya duniani.

Inayumkinika kuwa baina ya 2010 na 2015, Dk. Shein aliishi kama kiongozi asiyekubalika miongoni mwa viongozi wenziwe kwenye CUF na hata CCM yake, lakini alisalia kuwa kiongozi anayeheshimika kwa wote.

Wananchi ambao waliamini kabisa kuwa hakuwa mshindi halali wa uchaguzi wa 2010, waliamua kumpa heshima yake kama kiongozi aliyekaa madarakani kwa moyo wa Maridhiano; na ikawa hivyo. Lakini urais anaouanza sasa unakumbana na yote mawili – kutokukubalika na kutokuheshimiwa.

Sio tu wapigakura wa CUF wanaomuona kuwa huyu ni mtawala aliyejitwalia madaraka kwa mtutu wa bunduki uliopachikwa kikaratasi cha kura kwenye sime yake, bali hata kwa wana-CCM wenzake ambao wanajuwa kuwa iliwabidi kufanya mapinduzi mengine kurejea madarakani, lakini sio kwa kura za wananchi

NSSF yahusishwa na ufisaidi wa 'mabilioni'

Mradi wa ujenzi wa daraja la Kigamboni.
Mradi mkubwa wa ujenzi wa mji mpya wa Kigamboni jijini Dar es Salaam uitwao Dege Eco Village, ulioanzishwa na Shirika la Taifa la Hifadhi ya Jamii (NSSF) umesimama huku ikiripotiwa kuwapo kwa ufisadi wa zaidi ya Sh179 bilioni katika mradi huo.

Mchoro wa mradi huo ulioanzishwa mwaka 2014 kwa gharama ya Dola za Marekani 653 milioni (Sh1.3 trilioni) unaonyesha utakapokamilika utachangia kubadili sura ya jiji la Dar es Salaam kwani kutakuwa na nyumba za kifahari, majengo ya hoteli, maduka makubwa, eneo la wazi la mapumziko, baa, shule, hospitali, kumbi za mikutano, nyumba za ibada na migahawa.

Hata hivyo, mradi huo unaosimamiwa na kampuni ya Hifadhi Builders Limited iliyoanzishwa na Bodi ya NSSF kwa ushirikiano na kampuni ya Azimio Housing Estate Limited (Ahel), huku wajenzi wakiwa kampuni ya M/s Mutluhan Construction Industry Company Limited kutoka Uturuki, huenda usikamilike kwa muda uliopangwa kwani umesimama tangu Januari, ingawa unadaiwa utaanza tena mwezi huu.

Ofisa mmoja mwandamizi wa Serikali ameliambia gazeti la Mwananchi kwamba ujenzi wa nyumba za Dege Eco Village ni miongoni mwa miradi ya kisasa ambayo NSSF imekaguliwa na kubainika kufisadi fedha baada ya kuingia mikataba bila kufuata taratibu, kanuni wala sheria za nchi.

Kwa mujibu wa ofisa huyo, ripoti ya ukaguzi iliyoishia Juni 2015, uliofanywa na Mdhibiti na Mkaguzi Mkuu wa Hesabu za Serikali (CAG) akishirikiana na taasisi ya kimataifa ya ukaguzi ya Ernst and Young imeanika ufisadi mkubwa unaotishia usalama wa fedha za wanachama wa shirika hilo.

Mtoa habari huyo amesema mradi wa nyumba za kisasa wa Kigamboni unaojengwa katika ekari 300, unakabiliwa na kashfa baada ya kubainika kuwa NSSF imenunua ekari hizo kutoka kwa mbia mwenzake Azimio Housing Estate Limited kwa zaidi ya Sh800 milioni kwa ekari, wakati shirika hilo linamiliki viwanja vingine maeneo hayo vyenye thamani ya Sh4.5 milioni kwa ekari.

“Ukipata ripoti hiyo ya ukaguzi utaweza kuona ilivyochambua miradi mbalimbali ya ujenzi jijini Dar es Salaam, Arusha, Mwanza, Pwani na Mtwara. Kwa mfano mradi wa Arumeru mkoani Arusha, NSSF imenunua viwanja kutoka Azimio kwa Sh1.8 bilioni kwa kila ekari,” alieleza ofisa huyo.

Uchunguzi unaonyesha kwamba Bodi ya NSSF na Azimio walitiliana saini Novemba 15, 2013, kuhusu uendeshaji wa miradi mbalimbali. Azimio walijieleza kuwa wanamiliki ardhi yenye ukubwa wa ekari 20,000 Kigamboni, ekari 655.3 Arumeru, ekari 7,832.7 Pwani, ekari 200 Mwanza, ekari 5,723.6 Mtwara, na kwamba maeneo hayo yanafaa kwa ujenzi wa miji ya kisasa.

Taratibu ziliitaka NSSF kujiridhisha kuhusu uwepo wa ardhi hiyo, uhalali wa kisheria wa Azimio kumiliki eneo hilo pamoja na thamani halisi ya ardhi hiyo kutoka mamlaka zinazohusika. NSSF hawakufanya hivyo na wala hawakumshirikisha Mwanasheria Mkuu wa Serikali.

“Napenda kukuthibitishia kwamba NSSF waliridhia bila ya kujiridhisha kuhusu uwapo wa ardhi hiyo bali walitiliana saini miradi ya pamoja kujenga nyumba Kigamboni na Arumeru bila kujiridhisha,” alisema ofisa huyo.

Mradi wa Kigamboni una thamani ya Dola za Marekani 653,436,675 (Sh1.3 trilioni), na mradi wa Arumeru thamani yake ni Dola 3,340,589,543 hadi utakapokamilika.

Tatizo jingine kubwa ni kuhusu umiliki wa mradi. Uchunguzi unaonyesha mkataba wa mradi huo uliitaka Azimio kuchangia asilimia 55 zikiwamo ekari 300 ambazo ni sawa na asilimia 20 ya mradi, huku NSSF ikichangia asilimia 45. Uchambuzi unaonyesha Azimio imetoa ekari 300 za Kigamboni kwa Dola 108,906,113, na ekari 655.3 za Arumeru kwa Dola 556,764,924.

Kwa hiyo kwa miradi miwili hiyo, NSSF ‘imenunua’ ardhi yenye thamani ya Dola 665,671,037 (Sh1.33 trilioni) kutoka Azimio.

Uchunguzi unaonyesha kuwa Serikali imekasirishwa na hatua ya taasisi hiyo ya umma ‘kununua’ ekari moja ya ardhi kwa zaidi ya Sh800 milioni huko Kigamboni, wakati bei halisi ya ardhi iliyotangazwa na Halmashauri ya Manispaa ya Temeke mwaka 2012 wakati ikiuza viwanja vyake ilikuwa Sh8, 000 kwa mita za mraba, kwa hiyo ekari moja ilikuwa Sh39 milioni.

Vilevile, NSSF yenyewe ilikuwa inamiliki ekari 267 Kigamboni ilizonunua kutoka kampuni ya Georgia Homes (T) Ltd kila moja kwa Sh4.5 milioni, hivyo hatua ya shirika hilo ‘kununua’ ekari moja kwa Sh800 milioni kutoka Azimio haikubaliki.

Hata mradi wa Arumeru, NSSF pia imebainika kufuja fedha kutokana na kukubali kununua ekari moja kwa Sh1.8 bilioni, kinyume na thamani halisi ya viwanja kwenye eneo ambalo lipo kilometa 30 kutoka Jiji la Arusha. Uchunguzi umebaini wenyeji wa eneo hilo wanauza ekari moja kwa bei kati ya Sh500, 000 na Sh1 milioni.

Hatua ya NSSF ‘kununua’ ekari 300 Kigamboni kila moja kwa Sh800 milioni imesababisha hasara ya Sh179 bilioni na ekari 655.3 Arumeru kununuliwa kila moja kwa Sh1.8 bilioni imeingiza hasara ya Sh1.165 trilioni. Kwa hiyo, miradi miwili hiyo imeingiza hasara ya Sh1.3 trilioni.

“Tusubiri, lakini nina uhakika watu ambao kwa uzembe, walilishauri shirika kuingia kwenye matatizo haya na kuhatarisha fedha za wanachama lazima watawajibishwa ili kuepusha matatizo mengine yajayo kwa fedha za wanachama wa mfuko,” alisema ofisa huyo.

Ofisa huyo alisema kwamba hadi ukaguzi ulipofanyika shughuli zote hata manunuzi ya vitu muhimu kwa ajili ya mkandarasi zilikuwa zinafanywa na NSSF pamoja na mawasiliano na wasambazaji wa huduma. Hadi wakati wa ukaguzi, NSSF ilikuwa imeingiza kwenye mradi Sh205.141 bilioni na hazikuwapo nyaraka zilizoonyesha mchango wa Azimio mbali ya ardhi.
CHANZO: MWANANCHI.

Zuma aponyoka kura ya kutokuwa na imani naye

Bunge la Afrika Kusini.
Rais Jacob Zuma wa Afrika Kusini amepenyoka kura ya kutokuwa na imani naye bungeni.
Zuma alipata kura kutoka kwa wabunge 233 wanaomuunga mkono dhidi ya 143 za wabunge ambao hawakuwa na imani naye.

Awali naibu spika alikuwa amewataka wabunge wapaze sauti hadharani kuhusu iwapo alikuwa anaunga mkono kura ya kutokuwa na imani au la.

Hata hivyo upinzani ulishinikiza kura hiyo iendeshwe kwa njia halisi sawa na kura zingine.
Wachanganuzi wa maswala ya kisiasa nchini Afrika kusini walikuwa wanatarajia matokeo hayo kutokana na idadi kubwa ya wabunge wa chama tawala cha ANC.

Bunge la Afrika Kusini liliamua kusikiza na kujadili hoja ya kumng'oa rais Jacob Zuma kufuatia shinikizo kutoka kwa vyama vya upinzani.

Spika wa bunge la Afrika Kusini bi Baleka Mbete, alikubali hoja hiyo ijadiliwe kufuatia mahakama ya juu ya Afrika Kusini kumpata rais Zuma na hatia ya matumizi mabaya ya madaraka yake.

Chama cha Economic Freedom Fighters (EFF) kinachoongozwa na Julius Malema kilienda mahakamani kikitaka rais Zuma ashurutishwe kulipa fedha zilizotumika kinyume cha sheria kufanya ukarabati katika makazi yake ya Nkandla.

Upinzani uliwasilisha kesi mahakamani baada ya bwana Zuma kupuuza uamuzi wa mwaka 2014 kuwa alinufaika kutokana na ukarabati wa nyumba yake na kwamba alistahili kulipa pesa zilizotumiwa.
CHANZO: BBC

Barcelona, Bayern zashinda

Luis Suarez
Timu za Barcelona na Bayern Munich zimeanza vizuri michezo yao ya kwanza ya hatua ya robo fainali ya klabu bingwa Ulaya.

Barcelona, wakicheza katika uwanja wao wa Camp Nou, wamechomoza na ushindi wa mabao 2-1 dhidi ya Atletico Madrid, mshambuliaji Luis Suarez akifunga mabao yote mawili.

Na bao la Atletico Madrid likifungwa na Fernando Torres ambae pia alitolewa nje kwa kadi nyekundu baada ya kupewa kadi mbili za njano.

Nao Bayern Munich wakiwa wenyeji wa Benfica wameshinda kwa bao 1-0 kwa bao lilowekwa kambani na kiungo Arturo Vidal.
BBC