Sitta aifuata Ukawa Z’bar

Mwenyekiti wa Bunge Maalum la Katiba Samuel Sitta akimpatia taarifa Rais wa Serikali ya Mapinduzi Zanzibar  Dk Ali Mohammed Shein juu ya mwenendo Bunge hilo na ulipofikia alipomtembelea Ikulu ya Migombani Zanzibar. Picha na Owen Mwandumbya 

Dodoma/ Z’bar. Wakati viongozi wa Umoja wa Katiba ya Wananchi (Ukawa) wakiweka kambi Zanzibar, Mwenyekiti wa Bunge Maalumu la Katiba, Samuel Sitta jana naye alitumia siku nzima visiwani humo akikutana na baadhi ya viongozi wa Serikali, katika kile kinachotafsiriwa kuwa kulinusuru Bunge hilo.

Habari zilizolifikia gazeti hili kutoka Zanzibar zinasema Sitta alikutana na Rais wa Zanzibar, Dk Ali Mohamed Shein, Makamu wa Kwanza wa Rais, Maalim Seif Sharif Hamad, Rais Mstaafu, Aman Karume na mwanasiasa wa siku nyingi wa CCM, Mzee Hassan Nassor Moyo.

Zanzibar kwa sasa ndiyo moyo wa upatikanaji wa Katiba Mpya kutokana na wajumbe wake katika Bunge kutegemewa ama kuipitisha au kuikwamisha kwa kuwa kila upande kati ya mbili zinazovutana, hauna uhakika wa kupata theluthi mbili za kura.

Baada ya kuondoka bungeni na kutangaza kususia vikao vya Bunge hilo Aprili 16, mwaka huu, siku mbili baadaye viongozi wa Ukawa waliingia Zanzibar wakitaka kufanya mikutano ya hadhara kuwaeleza wananchi sababu za kufanya hivyo, lakini wakazuiwa na polisi na hadi jana walikuwa wanasubiri kibali.

Safari ya Sitta

Katibu wa Bunge Maalumu, Yahya Khamis Hamad pamoja na kuthibitisha ziara ya Sitta Zanzibar kuwa alikuwa akutane na Dk Shein, alisema hafahamu lolote kuhusu mkutano wake na Maalim Seif ambaye pia ni Katibu Mkuu wa CUF.

“Sifahamu malengo ya safari wala walichokwenda kuzungumza, ila ni kweli kwamba alifika Zanzibar leo (jana) na alitarajiwa kuondoka jioni kurejea Dodoma,” alisema Hamad na kuongeza:

“Hilo la kuonana na Maalim Seif silifahamu ila ninachojua aliniambia nimfanyie miadi ya kuonana na Dk Shein na nikaifanya kama alivyoelekeza.”

Mapema habari zilizolifikia gazeti hili kutoka Zanzibar zilisema, Sitta baada ya kukutana na Karume, Shein na Mzee Moyo alitarajiwa kukutana na Maalim Seif saa 9:00 alasiri.

Katibu wa Maalim Seif, Issa Kheri Hussein alithibitisha kwamba Sitta alikutana na kiongozi huyo nyumbani kwake, Mbweni saa 9:30 alasiri jana, lakini alidai kutokuwa na taarifa za mazungumzo hayo.

“Hilo naweza kulithibitisha kwamba mkutano huo umefanyika lakini mazungumzo yenyewe yalikuwa ya faragha na mimi baada ya Sitta kufika niliondoka, hivyo sikuweza kufahamu kilichozungumzwa kwa undani, pengine mpaka nizungumze na Maalim mwenyewe,” alisema Hussein.

Ziara ya Sitta kwenda Zanzibar imekuja wakati ambao kumekuwa na wasiwasi mkubwa wa kukwama kwa vikao vya Bunge hilo kutokana na msimamo wa Ukawa.

Leo vikao vya Bunge hilo vinatarajiwa kuendelea mjini Dodoma bila wajumbe wa Ukawa ambao viongozi wake wamesisitiza kwamba hawatarudi hadi pale watakaporidhika kwamba kuna utashi wa kweli wa kuwezesha kupatikana kwa Katiba Mpya.

Ukawa unaundwa na wajumbe wapatao 200 kutoka vyama vya Chadema, CUF, NCCR-Mageuzi, NLD, DP na baadhi ya wajumbe kutoka kundi la 201.

Viongozi wa Ukawa

Viongozi wa Ukawa kwa nyakati tofauti walisema wamesikia kuhusu safari ya Sitta kwenda Zanzibar lakini hawakuwa na taarifa za ndani kuhusu mazungumzo yake na Maalim Seif.

Hata hivyo, walisema hata kama amekwenda kwa lengo la kupata suluhu, hawezi kufanikiwa pasipo kuwashirikisha.

Mwenyekiti wa CUF, Profesa Ibrahim Lipumba alisema: “Inawezekana kweli Sitta ataonana na Maalim Seif, lakini lazima afahamu kwamba kurejea kwetu katika Bunge lazima uwe uamuzi wa chama ambacho mimi ni mwenyekiti wake na Maalim ni Katibu Mkuu.”

“Kwa hiyo uamuzi wetu wa kuondoka pale bungeni ulikuwa ni uamuzi wa kichama, maana mimi kama mwenyekiti wa CUF niko katika Bunge hilo na tulishauriana na wabunge pamoja na wajumbe wa Baraza la Wawakilishi lakini zaidi ya hapo tuna makubaliano na wenzetu katika Ukawa,” alisema.

Alisema Ukawa wataweza kurejea katika Bunge kwa sharti moja kubwa kwamba lazima rasimu itakayojadiliwa iwe ni ile inayotokana na kazi ya Tume ya Mabadiliko ya Katiba iliyoongozwa na Jaji Joseph Warioba.

“Kinachoonekana pale bungeni ni kwamba wapo watu wanataka kutushirikisha sisi tujadili rasimu yao wanayotaka kuileta kwa njia wanazozijua wao, hilo hatutalikubali, kwa hiyo mazungumzo yoyote lazima yawe na lengo,” alisema.

Mwenyekiti wa Chadema, Freeman Mbowe ambaye pia ni mjumbe katika Bunge hilo alisema: “Sisi msimamo wetu uko wazi, kwa sababu CCM wameonyesha msimamo mkali kuhusu kile wanachokitaka, wanataka kutumia wingi wao basi tumewaachia waendelee kwani tatizo liko wapi? Mimi sioni kwa nini wanahangaika wakati uwezo wa kupitisha Katiba wanayoitaka wanao.”

Aliungana na Profesa Lipumba kwamba hakuna maridhiano yatakayofanywa nje ya Ukawa na kwamba hata kama Sitta amekutana na Maalim Seif, tayari walishakubaliana kuwa na msimamo wa pamoja katika suala hilo la Katiba.

Mwenyekiti wa NCCR-Mageuzi, James Mbatia mbali na kusema amesikia kuhusu ziara ya Sitta Zanzibar, alisisitiza kwamba utashi wa kisiasa ndiyo utakaoiokoa Katiba Mpya.


Imeandikwa na Neville Meena, Edwin Mujwahuzi, Sharon Sauwa na Ibrahim Bakari, Dodoma.


CHANZO: MWANANCHI.

Chapisho la Tatu la Taarifa za Kidemografia kuzinduli na Rais Kikwete

Na Othman Khamis Ame - OMPR

 

Kamati  Kuu ya Taifa ya Sensa ya Watu na Makazi ya Mwaka 2012 inatarajia kuzindua  Chapisho la Tatu la Taarifa za msingi za Kidemografia, Kijamii na Kiuchumi Tarehe 23 April mwak huu wa 2014 katika kusherehekea miaka 50 ya Muungano wa Tannganyika na Zanzibar.

 

Uzinduzi huo unaotarajiwa kufanywa na Rais wa Jamuhuri ya Muungano wa Tanzania Dr. Jakaya Mrisho Kikwete utafanyika katika Ukumbi wa Kimataifa wa Julius Nyerere Mjini Dar es salaam.

 

Taarifa ya uzinduzi huo imefahamika ndani ya Kikao cha Kamati Kuu ya Taifa ya Sensa ya Watu na Makazi ya mwaka 2012 kilichofanyika chini ya Mwenyekiti Mwenza wa Kamati hiyo Makamu wa Pili wa Rais wa Zanzibar Balozi Seif Ali Iddi kwenye ukumbi wa Wizara ya Nchi Ofisi ya Waziri Mkuu Tawala za Mikoa na Serikali za Mitaa iliyopo Mjini Dodoma.

 

Akitoa Taarifa ya Wizara ya Fedha ya Serikali ya Jamuhuri ya Muungano wa Tanzania Naibu Waziri wa Wizara hiyo Mh. Muigulu Nchemba alisema maandalizi ya machapisho mengine 10 yanaendelea kufuatia kukamilika kwa zoezi la Sensa ya Watu lililofanyika mwezi Oktoba mwaka 2012 Nchini kote Tanzania.

 

Mh. Nchemba aliyataja baadhi ya machapisho hayo yatazingatia zaidi takwimu zilizokusanywa na wataalamu wa Sensa zinazohusu Vizazi na ndoa, Elimu, Uhamiaji na Makazi pamoja na hali ya ulemavu.

 

Alizipongeza Taasisi na Mashirika ya Kitaifa na Kimataifa kupitia Walaamu wao kwa kushirikiana na Wizara hiyo katika kufanikisha kazi ya Sensa licha ya changamoto kubwa za upatikanaji wa fedha.

 

“ Tunawashukuru wadau wetu wa maendeleo ambao kwa kweli wametusaidia kutuunga mkono katika zoezi hilo na zaidi ya Shilindi Bilioni Tatu {3,000,000,000 } walizitenga kwa ajili ya kazi hiyo “. Alisema Mh. Muigulu Nchemba.

 

Akitoa Taarifa fupi ya utekelezaji wa kazi ya uhakiki wa Baadhi ya mipaka ya Wilaya Tanzania Bara na Zanzibar kwenye Kikao hicho Mkurugenzi  Mkuu wa Ofisi ya Taifa yaTakwimu Tanzania Dr. Albina Chua alisema zoezi la uhakiki huo tayari limeshafanyika kwa Wilaya za Gairo na Chemba kwa Tanzania Bara na Wete na Micheweni kwa upande wa Zanzibar.

 

Dr. Albina alisema uhakiki huo wa mipaka ya Wilaya na Halmashauri umekuja kufuatia mapungufu yaliyojitokeza katika baadhi ya Wilaya hizo na kusababisha kuwemo kwa matumizi ya mipaka zaidi ya mmoja.

 

Alisema Utekelezaji wa kazi hiyo ulitokana na matokeo ya kazi ya awali iliyofanywa katika Wilaya ya Gairo ambapo Kamati ya Taifa ya ushauri ya Sensa iliagiza  kufanyika kama sampuli ya kujua tatizo la utoaji wa mipaka ya kiutawala.

 

Naye Mtakwimu Mkuu wa Serikali ya Mapinduzi ya Zanzibar Mohd Hafidh akitoa Taarifa ya Utekelezaji wa Kazi hiyo ya uhakiki wa mipaka kwa upande wa Zanzibar alisema kazi hiyo imeanza kwa kuundwa kwa Timu ya Maofisa watakaoshughulikia kazi hiyo.

 

Alisema kazi hiyo iliyoanza Tarehe 8 Aprili mwaka huu inatyarajiwa kuchukuwa wiki mbili katika Wilaya ya Wete na kuendelea katika Wilaya ya Micheweni lengo ni kuziwezesha Taasisi husika kujua changamoto mbali mbali za mipaka ya Wilaya na namna ya kuzitafutia ufumbuzi ili kuwa na Mipaka inayofanana.

 

Akitoa shukrani zake kwa Wajumbe wa Kamati hiyo Mwenyekiti Mwenza wa Kamati Kuu ya Taifa ya Sensa ya Watu na Makazi ya mwaka 2012 Makamu wa Pili wa Rais wa Zanzibar Balozi Seif Ali Iddi aliipongeza Sekreteri ya Kamati Kuu ya Taifa ya Sensa kwa Kazi kubwa inayoendelea kuifanya tokea kumalizika kwa zoezi la Sensa ya watu na Makazi Nchini Tanzania.

UKAWA kuzunguka nchi nzima

Viongozi wa UKAWA wakizungumza na waandishi wa Habari miongoni mwa mikutano yao. (Picha sio halisi)

Na Nassor Khamis, Zanzibar.

MUUNGANO wa Vyama vinavyounda Umoja wa katiba ya Wananchi(UKAWA) ndani ya Bunge maalum la katiba  wamesema kumekuwa na juhudi zinazo fanywa ili kuleta maridhiano ila hawapo tayari kwa maridhiano hayo badala yake wanakusudia kuzunguka nchi nzima kuwaeleza wananchi kile kinacho endelea kutokana na mchakato wa katiba mpya.

Hayo yameelezwa na Mwenyekiti wa Chama cha Demokrasia na Maendeleo ambae pia ni Mwenyekiti wa umoja huo, Bw, Freeman Aikaeli Mbowe wakati akizungumza na Waandishi wa Habari katika ukumbi wa hoteli Mansoun iliyopo Shangani Mjini Unguja.

Alisema kuwa ziara hiyo ya kuzungukza nchi nzima itaanza siku ya Jumatano kwa kufanya maandamano pamoja na mkutano wa hadhara katika viwanja vya Demokrasia Kibanda maiti mjini Unguja ukifuatiwa na mkutano mwengine Kisiwani Pemba siku ya Alkhamis.

Alisema kuwa wamefikia hatua hiyo kufuatia kuachwa kujadiliwa kwa rasimu ya pili ya katiba yenye muundo wa serikali tatu iliyobeba maoni ya Wananchi na badala yake kujadili rasimu inayopendekezwa na chama cha Mapinduzi inayotetea mfumo wa muundo wa serikali mbili jambo ambalo hawakubaliani nalo.

“UKAWA hatuwezi kuvumilia vitendo vya ukiukwaji wa sheria vinavyofanywa na CCM kwani katiba hii inayotafutwa ni ya wananchi sio ya chama cha Mapinduzi.”alieleza Mbowe.

Aidha amesema kuwa lengo la mikutano hiyo ni kuwaamsha wananchi wa Tanzania kudai haki yao ya msingi juu yakupatikana kwa katiba inayotokana na maoni yao waliyoyawasilisha kwa tume mabadiliko ya katiba iliyokuwa ikiongozwa na Jaji Warioba.

Aidha amelitaka jeshi la Polisi nchini kutoa haki ya kufanya mikutano hiyo kama wananvyo fanya kwa Katibu mkuu wa CCM Bw, Abdurrahman Kinana anvyozunguka nchi nzima kufa nya mikutano ya hadhara.

“Katibu mkuu wa CCM Abdurrahman Kinana akishirikiana na Nape Nauye pamoja na viongozi wengine wa CCM wamekuwa wakizunguka Nchi nzima kuhamasisha watu kukubaliana na mapendekezo ya CCM katika mchakato huu hivyo na sisi tupewe fursa hiyo.” Alisema Mh, Mbowe.

Akizungumza katika mkutano huo Mwenywkiti wa Chama cha Wananchi CUF Profesa Ibrahim Haruna Lipumba alieleza kuwa wajumbe wanaounda  umoja huo wameamua kutoka bungeni kutokana na kuchoshwa na kauli za ubaguzi miongoni mwa Watanzania wa matabaka mbalimbali jambo linaloharibu mustakbali mzuri wa upatikanaji wa katiba hiyo.

Alifahamisha  kuwa kumekuwa kukitolewa kauli za kibaguzi dhidi ya Watanzania watokao kisiwa cha Pemba pamoja na wananchi wenye asili ya kihindi na kiarabu pamoja na vitisho kwa wananchi pamoja na uchochezi wa kidini huku viongozi wa serikali wakishindwa kukemea vitendo hivyo jambo ambalo ni hatari kwa taifa.

Akizungumzia kitendo cha Kuzuiwa kwa mkutano wa hadhara wa UKAWA uliokuwa ufanyike April 19 mwaka huu Profesa Lipumba amesema hayo ni maagizo yliyotelewa na viongozi wakuu wa serikali kutoka Dar es salam akiwamo Waziri mkuu wa serikali ya Jamhuri ya Muungano wa Tanzania.

Nae Mwenyekiti wa NCCR- MAGEUZI Bwana James Mbatia amewataka Wazanzibari wasikubali kutenganishwa kwa misingi ya udini na maeneo wanayotoka kama inavyoelezwa na baadhi ya viongozi wenye lengo la kuwagombanisha kwa maslahi yao.

Alisema kuwa kitendo cha Waziri wa Nchi ofisi ya Waziri mkuu Sera na uratibu bwa Bunge kutoa kauli za kuanzishwa kwa dola ya kiislamu Zanzibar pamoja nav Jeshi kuchukua Nchi endapo utapitishwa mfumo wa srikali tatu ni kuchochea vurugu pamoja na kujenga khofu kwa Wananchi.

Bilal, Magufuli,Kova wanusurika kifo ajali ya helikopta Dar

Helikopta iliyokuwa imembeba Makamu wa Rais, Dk Mohamed Gharib Bilal baada ya kuanguka jana katika Uwanja wa Ndege wa Julius Nyerere Dar es Salaam jana.

Dar es Salaam. Makamu wa Rais, Dk. Mohamed Ghalib Bilal amenusurika kifo katika ajali ya helikopta iliyoanguka katika Uwanja wa Ndege wa Dar es Salaam ilipokuwa ikiruka kwenda kukagua madhara ya mafuriko.

Pamoja na Dk. Bilal, wengine walionusurika kifo katika ajali hiyo ni Waziri wa Ujenzi, Dk. John Magufuli, Mkuu wa Mkoa wa Dar es Salaam, Said Meck Sadick na Kamanda wa Polisi, Kanda Maalumu ya Dar es Salaam, Suleiman Kova ambao walipata majeraha madogo.

Taarifa za ajali hiyo zikiambatana na picha kadhaa za helikopta hiyo ya Jeshi la Ulinzi la Wananchi wa Tanzania (JWTZ), zilianza kusambaa kwenye mitandao ya kijamii na baadaye kuthibitishwa na Mkuu wa Majeshi (CDF), Jenerali Davis Mwamunyange.

Mwamunyange afafanua

Akizungumza na mwandishi wetu, Jenerali Mwamunyange alisema ajali hiyo ilihusisha helikopta ya JWTZ yenye muundo wa Agusta Bell (AB 412) iliyotengenezwa Italia.

Alisema helikopta hiyo ilipangwa kuwazungusha viongozi hao katika maeneo yaliyoathiriwa na mvua zinazoendelea kunyesha jijini Dar es Salaam na kusababisha maafa.

Jenerali Mwamunyange ambaye pia jana alitembelea baadhi ya maeneo yaliyokumbwa na mafuriko kuona kama kuna msaada wa haraka wa kijeshi unaohitajika, alisema helikopta hiyo, ilipata ajali punde tu baada ya kuruka na kugonga ukuta.

“Ni kweli kwamba helikopta iliyopata ajali inamilikiwa na JWTZ…Hiyo ni ajali kama ajali nyingine yoyote. Imekuwa ni bahati mbaya wakati inaanza kuruka ikagonga ukuta wa jengo na kushuka chini….Mpaka sasa hatujajua sababu ya ajali hiyo,” alisema.

Aliahidi kwamba uchunguzi yakinifu kuhusu chanzo cha ajali hiyo utafanyika kwa kuhusisha wataalamu. Alisema helikopta hiyo ilikuwa ni miongoni mwa usafiri wa kutegemewa jeshini na ilifanyiwa majaribio Jumamosi na jana asubuhi na haikuonyesha tatizo lolote na kwamba imekuwa ikifanya kazi kwa muda mrefu bila matatizo yoyote.

Kamanda wa Polisi wa Uwanja wa Ndege wa Julius Nyerere (JNIA), Selemani Hamisi alisema ndege hiyo imeungua kutokana na hitilafu, ingawa alisema yeye siyo msemaji kwa kuwa wapo viongozi wake wa juu.

Alipoulizwa Kamanda Kova alisema walipanda helikopta hiyo saa 3.30 asubuhi lakini ghafla ikarudi chini.

“Nilikuwa wa kwanza kuruka wakati waokoaji wakiendelea kuokoa wengine waliokuwa ndani,’’ alisema Kova na kuongeza: “Tunawashukuru sana wale waliokuwapo nje ya helikopta hiyo kwani walisaidia tukashuka salama na kuendelea na majukumu yetu ya Taifa kama kawaida.’

Meneja wa JNIA, Moses Malaki alisema helikopta hiyo ilianguka baada ya kuruka kiasi cha mita 10 juu... “Ilibeba watu 11 wakiwamo waandishi wa habari na walinzi wa viongozi hao.”

Mchunguzi Mkuu wa Ajali za Ndege kutoka Wizara ya Uchukuzi, John Nyamwihura alisema asingeweza kutoa ufafanuzi kuhusu helikopta hiyo kwa sababu inamilikiwa na jeshi.

Hata hivyo, alisema kuna uwezekano mkubwa wa kuanguka kwa sababu ya mabadiliko ya hali ya hewa ikiwamo upepo mkali na mvua nyingi.

Alitolea mfano wa kilichoipata ndege ya Shirika la Ndege la Kenya (Kenya Airways), wiki iliyopita kuwa ni kwa sababu ya upepo mkali uliokuwapo uwanjani hapo. Ndege hiyo iliacha njia wakati wa kutua JNIA.

Nyamwihura alisema ajali nyingine ya helikopta ya jeshi anayoikumbuka ilitokea Ndanda mkoani Mtwara mwaka 1990.

Taarifa ya jeshi

Taarifa ya JWTZ iliyotolewa jana ilisema ajali hiyo ilitokea JNIA (upande wa Jeshi) ilipokuwa katika hatua ya kuanza kuruka saa 3:30 asubuhi na kuwataja wengine waliokuwamo kuwa ni Msaidizi wa Makamu wa Rais, Dk. Mnzava; Msaidizi wa Kamanda Kova na waandishi wa habari watatu. 

Ilisema Makamu wa Rais na ujumbe wake hawakupata majeraha katika ajali hiyo. Pia rubani na wasaidizi wake walitoka salama.

Imeandikwa na Pamela Chilongola, Florence Majani, Mpoki Bukuku na Mkinga Mkinga.

CHANZO: MWANANCHI.

Mvua yaleta kizaazaa

Jeshi la Polisi Kikosi cha Uokoaji jana kililazimika kutumia nguvu kuwaokoa wakazi wawili wa Jangwani waliokuwa wamezingirwa na maji, lakini wakigoma kuokolewa.PICHA|MAKTABA 

Dar es Salaam. Vifo, uharibifu wa mali, miundombinu na mafuriko, msongamano wa magari, baadhi ya wakazi wa jiji hilo kukimbia makazi yao, wengine kulala kwenye magari na nyumba za wageni vimewakumba wakazi wa Jiji la Dar es Salaam na vitongoji vyake, kutokana na mvua zinazoendelea kunyesha kwa siku ya nne mfululizo.

Timu ya waandishi wa gazeti hili walifanya uchunguzi maeneo mbalimbali na kushuhudia hali halisi ilivyo, huku wanawake na watoto wakionekana kupata shida zaidi kwa kukaa nje ya nyumba zao, wengine kuhamia kwenye majengo ya shule.

Kamanda wa Polisi Kanda Maalumu ya Dar es Salaam alisema jana kuwa walikuwa wakiendelea kukusanya taarifa za maafa ikiwamo vifo alivyosema ni vingi.

Naye Mkuu wa Mkoa wa Dar es Salaam Said Meck Sadik alisema kuwa yupo kwenye kikao na watatoa taarifa zaidi za maafa baadaye.

Tegeta, Boko na Bunju

Mtoto anayekadiriwa kuwa na umri wa miaka minne, amefariki dunia baada ya nyumba aliyokuwa akiishi kujaa maji na kushindwa kujiokoa kutokana na ulemavu, wakati mama yake akiwa kwenye shughuli za biashara.

Majirani wa mtoto huyo walisema tofauti na kawaida yao kumtoa mtoto huyo mvua inaponyesha, jana walimsahau na mama yake aliporejea alikuta maiti ya mtoto wake ikielea chumbani.

Katika mvua hizo takribani kaya 180 zimekumbwa na mafuriko huku wakazi wake wakijikuta hawana pa kwenda.

“Mimi nimekuwa hapa tangu Tanu imezaliwa, nyumba yangu imejaa maji nimeshazeeka sina mtu wa kunisaidia, wala sijui wapi nitakwenda. Nomba Serikali inisaidie,”alisema Hussein Ngaoma ambaye ni mjumbe wa nyumba kumi katika eneo hilo.

Naye Husna Ally ambaye pia nyumba yake imekumbwa na mafuriko alisema: “Nasikitika, maana nimepata hasara kubwa. Mimi ni mfanyabiashara katika eneo hili la Boko, nina duka la kuuzia samani limejaa maji na sijaweza kuokoa chochote. Mzigo wa Sh30 milioni umeharibika wote.”

Jeti Lumo

Katika eneo hilo licha ya kujaa maji, mfanyabiashara ndogondogo amefariki dunia kwa kusombwa na maji alipokuwa akijaribu kuokoa jiko lake la kuchomea mishikaki lililotumbukia kwenye mtaro.

Wakizungumza na gazeti hili wakazi wakazi wa eneo hilo walisema kuwa wakati mvua zilipoanza kunyesha, marehemu huyo waliyemtaja kwa jina moja la Ismail alikuwa akiendelea na kazi yake ya kuchoma nyama kando ya barabara, lakini baadaye maji yakafurika na kulisomba jiko lake, ndipo mtu huyo alipoingia kwenye mtaro huo ili alitoe, ndipo akasombwa na maji yaliyokuwa yakienda kwa kasi.

“Tulikuwa hapa na Ismail tunachoma nyama mvua ilikuwa inanyesha ghafla maji yakafurika na kubeba jiko, alipoingia mtaroni kulitoa maji yakamsomba. Nasikitika kuwa hatukuweza kumwokoa akapoteza maisha,” alisema Mwajuma Said.

Msasani na Mikocheni

Waandishi wetu walishuhudia eneo maarufu la ‘My fair plaza’ likiwa limezingirwa na maji huku wafanyakazi wakijitahidi kuyatoa maji, huku wakazi wa Msasani Bonde la Mpunga wakionenekana kuhangaika kuokoa vitu ndani ya nyumba zao, zilizoingiliwa na maji.

“Mvua ilianza kunyesha jana asubuhi, maji yakazidi kujaa kama unavyoona tunajitahidi kuokoa vinavyookoleka na tunahofia kupata magonjwa ya milipuko,” alisema mkazi wa eneo hilo Judith Peter.

Mkwajuni, Jangwani na Kigogo

Katika eneo la Jangwani watu walionekana wakiwa wamekimbia makazi yao huku wengine wakiokoa baadhi ya vyombo vyao huku magari ya Kampuni Barabara ya Strabag inayojenga barabara ya magari yaendayo kasi yakiwa yamefunikwa na maji na umati wa watu ulikiendelea kushangaa mafuriko.

Baadhi ya wakazi wa Bonde la Mto Msimbazi eneo la Vingunguti wamelazimika kugeuza shule kama makazi yao ya muda kwa hofu ya kukumbwa na mafuriko kutokana na mvua kubwa zinazoendelea kunyesha.

Gazeti hili lilifika kwenye Shule ya Msingi Mtakuja na kushuhudia wanawake, watoto na wanaume wachache wakiwa wamejikunyata kwenye baadhi ya vyumba vya madarasa ya shule hiyo waliyoyafanya makazi ya muda.

Mmoja wa wanawake hao, Amina Said alisema baada ya mvua kuanza kunyesha juzi jioni maji yalianza kutiririka na kujaa bondeni karibu na nyumba anayoishi hivyo akalazimika kumchukua mwanawe na kukimbilia shuleni hapo.

“Nilikuwa sina sehemu nyingine ya kukimbilia na mtoto hivyo shule na ndiyo ikawa mkombozi. Mafuriko yangetukuta tusingepona…tulilala kwenye haya madawati na mvua ikiendelea kunyesha tutaendelea kukaa hapa,” alisema Said.

Mama huyo alisema juzi usiku vyumba vyote saba vya madarasa ya shule hiyo vilikuwa vimejaa watu waliolazimika kuziacha nyumba zao na kwenda kulala shuleni hapo.

Huku wengine walilimbilia shuleni walioshindwa kufika nyumbani kutokana na barabara kufurika maji na kusababisha magari na hata bajaji kushindwa kutembea hao walilazimika kulala kwenye nyumba za wageni.

Akizungumza na gazeti hili mmoja wa wahudumu katika nyumba ya kulala wageni ya New Kampala iliyopo eneo la Gongo mboto, Khalid Fikiri alisema walianza kupokea wageni kwa wingi majira ya saa nne na nusu usiku tofauti na ilivyo siku za kawaida.

“Kwa kawaida tunapokea wageni sita lakini juzi tulipokea wageni kumi na sita kutokana na kukwama njiani kwa sababu ya mvua”alibainisha Fikiri.

Alisema kutokana na kutambua uhitaji wa baadhi ya wageni waliokuwa wanaenda kuomba vyumba vya kulala kwa walikokuwa na fedha nusu pia waliwapa malazi.

“Tunatozaga 10,000 kwa chumba ila kwa waliokuwa na fedha pungufu hatukusita kuwasaidia,” alikiri Fikiri.

Naye Meneja wa nyumba kulala wageni ya Gladys Maxmillian Machango alisema alipokea wageni waliokuwa wamekwama na kushindwa kufika nyumbani kutokana na mvua.

Wawili wagoma kuokolewa

Jeshi la Polisi Kikosi cha Uokoaji jana kililazimika kutumia nguvu kuwaokoa wakazi wawili wa Jangwani waliokuwa wamezingirwa na maji, lakini wakigoma kuokolewa.

Katika tukio hilo lililovutia watu wengi, waokoaji walichukua takriban saa mbili kushawishi wazee hao mwanamke na mwanaume ili waokolewe, huku wakiendelea na shughuli zao wakati vikosi hivyo vikijaribu kuwatoa kwa kutumia mtumbwi.

Maofisa wa polisi waliokuwa katika eneo hilo walionyesha kukerwa na hali hiyo, huku wakiwa wamechanganyikiwa kwa kile kilechoelezwa kwamba wakitumia nguvu wazee hao wangeweza kujirusha katika maji yaliyokuwa yamejaa, yakienda kwa kasi hivyo kuhatarisha maisha.

=Imeandaliwa na Hilda Sigala, Suzan Mwilo, Herieth Makwetta, Ibrahim Yamola na Mpoki Bukuku
Kizaazaa

CHANZO: MWANANCHI.